26.10.2026 | 01:04
Մոտ 540 ձայնով պարտվել ենք Ստեփանավանում. ՔՊ-ական․ ՏԵՍԱՆՅՈւԹ
Իրանն ամրապնդում է Խարգ կղզու պաշտպանությունը՝ ԱՄՆ-ի հնարավոր ցամաքային գործողությունից մտահոգության ֆոնին. CNN
Քաղաքականություն
26.03.2026 | 21:51
Թեհրանը լրացուցիչ զորքեր և ՀՕՊ համակարգեր է տեղակայում Խարգ կղզում՝ վախենալով ամերիկյան հնարավոր դեսանտային գործողությունից, հաղորդում է CNN-ը՝ հղում անելով ԱՄՆ հետախուզությանը, փոխանցում է The Insider-ը։
Աղբյուրների տվյալներով՝ վերջին շաբաթներին Իրանը կղզի է տեղափոխել լրացուցիչ շարժական հակաօդային պաշտպանության համակարգեր և զինվորական անձնակազմ, ինչպես նաև սկսել է ականապատել ափամերձ գիծը։ Խարգ կղզին Իրանի համար կարևոր նավթային տերմինալ է, որը մշակում է երկրի նավթի արտահանման մոտ 90%-ը։
CNN-ի տվյալներով՝ Թրամփի վարչակազմը քննարկում է այն գրավելու համար ամերիկյան զորքեր օգտագործելու հնարավորությունը։ Սակայն պաշտոնյաները և ռազմական փորձագետները համաձայն են այն հարցում, որ նման գործողությունը կուղեկցվի զգալի ռիսկերով, այդ թվում՝ զինծառայողների կորուստներով։
Գործողության իրագործելիությունը նույնպես կասկածի տակ է դրվում. օրինակ՝ կղզու գրավումը քիչ հավանական է, որ ապահովի Հորմուզի նեղուցում նավագնացության անվտանգությունը և չի լուծի էներգակիրների գների աճի խնդիրը։
Խարգում գտնվող ռազմական օբյեկտները մարտի 13-ին արդեն ենթարկվել են ԱՄՆ ուժերի հարձակմանը։
Ավելի ուշ հաղորդվել էր, որ ԱՄՆ-ը տարածաշրջան է տեղափոխում շուրջ 5000 լրացուցիչ ծովային հետևակայինի և 2000 դեսանտայինների։
Թարգմանությունը՝ Էմմա Չոբանյանի
