27.10.2026 | 00:08
Վարդան Մինասյանն աշխատանքի է անցել Լիբանանում
ԱՄՆ-ն Իրանի ԱԳ նախարարին և խորհրդարանի խոսնակին ժամանակավորապես հանել է իր թիրախների ցուցակից, որ կարողանան մասնակցել բանակցություններին. WSJ
Քաղաքականություն
26.03.2026 | 13:03
ԱՄՆ-ն ու Իսրայելը Իրանի արտաքին գործերի նախարար Աբբաս Արաղչիին և խորհրդարանի խոսնակ Մոհամմադ Բաղեր Ղալիբաֆին 4-5 օրով հանել են իրենց թիրախների՝ «վերացվողների ցուցակից», որպեսզի նրանք կարողանան մասնակցել բանակցություններին։ Այս մասին գրում է The Wall Street Journal-ը՝ հղում անելով երկու ամերիկացի պաշտոնյաների, փոխանցում է Meduza-ն։
Նշվում է, որ բանակցությունները դեռևս կասկածի տակ են։ Արաղչին վերջին հայտարարության մեջ պնդել է, որ Իրանը մտադիր չէ բանակցել, սակայն արաբ միջնորդները նշում են, որ Թեհրանը մասնավոր զրույցներում «մեծ ճկունություն է ցուցաբերում» և պատրաստ է լսել առաջարկներ։
Այնուամենայնիվ, երկու կողմերն էլ ներկայում ներկայացնում են պահանջներ, որոնք «զգալիորեն գերազանցում են պատերազմից առաջ քննարկվածի շրջանակները», գրում է WSJ-ն։ Իրանը պահանջում է վնասի փոխհատուցում, տարածաշրջանում ամերիկյան բազաների փակում և չհարձակման երաշխիքներ, մինչդեռ ԱՄՆ-ը պահանջում է, որ Իսլամական Հանրապետությունը հրաժարվի ուրանի հարստացումից և միջուկային ծրագրից, ինչպես նաև կրճատի իր հրթիռային ծրագիրը։
Մարտի 23-ին Թրամփը հայտարարեց, որ ԱՄՆ-ը բանակցություններ է վարում Իրանի հետ և մոտ է պատերազմը դադարեցնելու համաձայնագրի կնքմանը: Իրանը հերքում է, որ որևէ բանակցություն է տեղի ունենում: Միևնույն ժամանակ, տարբեր լրատվամիջոցների աղբյուրները հաղորդում են, որ Թեհրանը պահանջներ է ներկայացնում, որոնք անհամատեղելի են ԱՄՆ-ի դիրքորոշման հետ, որը գոյություն ուներ նույնիսկ պատերազմի սկսվելուց առաջ: ԱՄՆ-ն, իր հերթին, Իրանին ներկայացրել է պատերազմը դադարեցնելու 15 կետանոց ծրագիր: Այն կոչ է անում Թեհրանին ամբողջությամբ հրաժարվել իր միջուկային ծրագրից, դադարեցնել տարածաշրջանում իր պրոքսի խմբերին աջակցելը և սահմանափակել իր հրթիռների քանակը և հեռահարությունը։
Մարտի 24-ին Սպիտակ տանը տեղի ունեցած մամուլի ասուլիսի ժամանակ Թրամփը հայտարարել էր, որ Իրանը կհրաժարվի իր միջուկային ծրագրից և ցանկանում է համաձայնագիր կնքել։ Նա նաև հայտարարել էր, որ Իրանի բոլոր առաջնորդներն «անհետացել են», և որ «ոչ ոք չգիտի՝ ում հետ խոսի», բայց Միացյալ Նահանգները բանակցություններ է վարում «ճիշտ մարդկանց հետ»։
Թարգմանությունը՝ Էմմա Չոբանյանի
