06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
ՊՆ-ն երկարաձգում է անհետ կորած զինծառայողների ընտանիքներին սոցիալական աջակցությունը
26.03.2026 | 10:47
Պաշտպանության նախարարությունը նախագիծ է շրջանառել, որով նախատեսում է երկարաձգել անհետ կորած զինծառայողների ընտանիքներին տրամադրվող սոցիալական աջակցությունը մինչև 2026 թվականի հունիսը ներառյալ։
Ներկայում գործող որոշմամբ՝ ամսական 300 հազար դրամի չափով աջակցությունը սահմանված է մինչև 2026 թվականի մարտը։ Այդ ժամկետի ավարտից հետո՝ ապրիլի 1-ից, այն պետք է դադարեցվեր այն ընտանիքների համար, որոնց դեպքում դեռ չկա զինծառայողին դատական կարգով անհայտ բացակայող ճանաչելու որոշում։ Առաջարկվող փոփոխությամբ աջակցությունը կշարունակվի ևս երեք ամիս՝ ապրիլից հունիս, ինչը կվերաբերի անհետ կորած 20 զինծառայողների ընտանիքների։ Ծրագրի իրականացման համար անհրաժեշտ լրացուցիչ ֆինանսավորումը կազմում է 18 մլն դրամ, որը նախատեսվում է ապահովել պետական բյուջեի շրջանակում վերաբաշխումների միջոցով։
Ուշագրավ է, որ ՊՆ-ի հեղինակած նախագծում «Ադրբեջանի կողմից 2020 թվականի սեպտեմբերի 27-ին սանձազերծված ռազմական գործողությունների հետևանքով անհետ կորածներ» ձևակերպումն է տված, այլ ոչ թե Ադրբեջանի կողմից սանձազերծված պատերազմ ձևակերպումը։
Հիշեցնենք՝ առնվազն այն, որ 2020-ին Ադրբեջանի զինուժը բոլոր ուղղություններով էր հարձակվել Արցախի վրա, թիրախավորել էր ոչ միայն ռազմական, այլ նաև քաղաքացիական օբյեկտները։
Նարեկ Կիրակոսյան
