26.10.2026 | 13:08
Ալեն Սիմոնյանն ու Կիպրոսի դեսպանը քննարկել են երկկողմ հարաբերություններն ու տարածաշրջանային զարգացումները
Իսրայելը հարվածել է Կասպից ծովի Էնզելի նավահանգստին՝ ռուս-իրանական զենքի մաքսանենգության ուղին խափանելու համար․ WSJ
Քաղաքականություն
25.03.2026 | 20:10
Մարտի 18-ին Կասպից ծովում գտնվող Բանդար Էնզելի իրանական նավահանգստին Իսրայելի հասցրած հարվածը նպատակ ուներ խափանել իրանա-ռուսական երթուղին, որն օգտագործվում էր զինամթերքի, անօդաչու թռչող սարքերի և այլ զենքերի մատակարարման համար։ Այս մասին հաղորդում է The Wall Street Journal-ը՝ հղում անելով իրավիճակին ծանոթ աղբյուրներին: Սա առաջին դեպքն է, երբ Իսրայելը հարձակվում է Կասպից ծովում գտնվող թիրախի վրա, գրում է The Insider-ը։
WSJ-ի կողմից ստուգված լուսանկարները ցույց են տալիս նավահանգստում գտնվող իրանական ռազմածովային շտաբի վնասը և ռազմանավերի ոչնչացումը։
Ըստ Իսրայելի բանակի՝ անցյալ չորեքշաբթի Բանդար Էնզելիի վրա իրականացված հարձակումը հարվածել է տասնյակ թիրախների, այդ թվում՝ նավեր, նավահանգիստ, հրամանատարական կենտրոն և վերանորոգման ու սպասարկման նավաշինարան։ «Այս հարվածի հիմնական նպատակն էր սահմանափակել ռուսական մաքսանենգությունը և ցույց տալ իրանցիներին, որ նրանք Կասպից ծովում պաշտպանական համակարգ չունեն», – ասել է Իսրայելի ռազմածովային ուժերի նախկին հրամանատար Էլիեզեր Մարոմը։
Իրանական Tasnim լրատվական գործակալության հաղորդմամբ՝ Բանդար Էնզելիի իշխանությունները հարձակման համար մեղադրել են Իսրայելին և Միացյալ Նահանգներին։ Նրանք պնդել են, որ հարվածներ են հասցվել Մաքսային գլխավոր վարչության, նավահանգստի և նավագնացության կազմակերպությունների շենքերին։ Մարտի 20-ին Tasnim-ը հաղորդել էր Էնզելիի վրա ևս մեկ հարվածի մասին, որի հետևանքով, ենթադրաբար, այրվել է տեղի բնակիչներին պատկանող 16 բեռնատար նավ։
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան մեկնաբանել էր նավահանգստի վրա հարձակումը՝ մեղադրելով ամերիկա-իսրայելական կոալիցիային մերձկասպյան պետություններին պատերազմի մեջ ներքաշելու փորձի մեջ.
«Այս ամենամեծ կասպյան նավահանգիստը կարևոր առևտրային և լոգիստիկ հանգույց է, որն ակտիվորեն օգտագործվում է ռուս-իրանական առևտրի, այդ թվում՝ սննդամթերքի մատակարարման համար: Ռուսաստանի և մերձկասպյան մյուս պետությունների տնտեսական շահերը, որոնք այս նավահանգստի միջոցով պահպանում են Իրանի հետ տրանսպորտային կապերը, վտանգված են»,- նշում է նա:
Ըստ Զախարովայի՝ Կասպից ծովը տարածաշրջանի երկրների և միջազգային հանրության կողմից միշտ ընկալվել է որպես խաղաղության և համագործակցության անվտանգ տարածք: Ագրեսորների անխոհեմ և անպատասխանատու գործողությունները ստեղծում են մերձկասպյան պետություններին ռազմական հակամարտության մեջ ներքաշելու ռիսկ:
ԱՄՆ ռազմածովային ուժերի հասանելիությունից շատ հեռու գտնվող Կասպից ծովը կապում է Ռուսաստանի և Իրանի նավահանգիստները, որոնք գտնվում են միմյանցից մոտավորապես 1000 կիլոմետր հեռավորության վրա, ինչը թույլ է տալիս Մոսկվային և Թեհրանին ազատորեն փոխանակել զենք և այլ ապրանքներ, այդ թվում՝ ցորեն և նավթ, նշում է WSJ-ը: Այս երթուղին հատկապես կարևոր է Շահեդ տեսակի անօդաչու թռչող սարքերի տեղափոխման համար, որոնք ներկայումս արտադրվում են ինչպես Իրանում, այնպես էլ Ռուսաստանում:
Թարգմանությունը՝ Էմմա Չոբանյանի
