24.04.2026 | 23:32
Կապանում ջրանջատում կլինի
Իսրայելն Ադրբեջան և Վրաստան ճանապարհորդելու հետ կապված նախազգուշացում է տվել՝ վկայակոչելով «Իրանի կողմից աջակցվող ահաբեկչությունները»
Քաղաքականություն
25.03.2026 | 22:37
Իսրայելի Ազգային անվտանգության խորհուրդը (NSC) առաջիկա հրեական տոների նախաշեմին հրապարակել է «Իրանին սահմանակից մի շարք երկրներ» ճանապարհորդելու հետ կապված նախազգուշացում՝ նշելով այն մտահոգությունները, որ «Իրանի հետ կապված կամ նրանից ազդված անձինք կարող են ահաբեկչական հարձակումներ իրականացնել Իսրայելի կամ հուդայականության հետ նույնականացված վայրերում», գրում է OC Media-ն։
Երեքշաբթի հրապարակված նախազգուշացումը, որպես մարտ ամսվա սկզբին արված նախորդ հայտարարության ավելի մանրամասն փոփոխություն, հնչում է այն ժամանակ, երբ ԱՄՆ-Իսրայել պատերազմը Իրանի դեմ մոտենում է չորրորդ շաբաթվան։
NSC-ն հայտարարել է, որ «Իրանի հետ շարունակվող պատերազմը մեծացնում է ահաբեկչության սպառնալիքն արտերկրում գտնվող իսրայելցիների դեմ», հղում անելով Արևմուտքի տարբեր երկրներում հրեական վայրերի վրա վերջերս կատարված մի քանի ահաբեկչական հարձակումներին։ Նշվում է, որ որ սպառնալիքները սրվում են Պասեքի և այլ իսրայելական կամ հրեական տոների պատճառով։
«Իրանին սահմանակից երկրների (Ադրբեջան, Վրաստան, Թուրքիա, Արաբական Միացյալ Էմիրություններ և Պարսից ծոցի երկրներ) վերաբերյալ խորհուրդ ենք տալիս չմասնակցել Իսրայելի կամ հուդայականության հետ կապված վայրերում կազմակերպվող միջոցառումներին (ներառյալ տոնական ճաշկերույթներին՝ հաշվի առնելով այն մտավախությունները, որ դրանք կդառնան իրանական տարրերի կողմից կինետիկ հարձակումների թիրախ»,- ասվում է հայտարարության մեջ։
Նախորդ նախազգուշացման մեջ, որը հրապարակվել էր մարտի 5-ին, Վրաստանի կամ Ադրբեջանի մասին չէր խոսվում: Ազգային անվտանգության խորհուրդը հստակ չի նշել, թե ինչու են երկու երկրները ներառվել այս հայտարարության մեջ, սակայն վերջերս եղել են պնդումներ «Ադրբեջանում հրեական վայրերին ուղղված իրանական ահաբեկչական դավադրությունների կանխարգելման, ինչպես նաև Վրաստանում իրանական ազդեցության աճի մասին մեղադրանքների մասին»:
Թարգմանությունը՝ Էմմա Չոբանյանի
