27.06.2026 | 06:03
ԱԱ-2026. Իսպանիան հաղթեց Ուրուգվային, Կաբո Վերդեն նույնպես դուրս եկավ փլեյ-օֆֆ. ՏԵՍԱՆՅՈՒԹ
Ֆիլիպիններն էներգետիկ արտակարգ իրավիճակ է հայտարարել Իրանի պատերազմի պատճառով
Քաղաքականություն
24.03.2026 | 21:49
Ֆիլիպինները դարձել է աշխարհում առաջին երկիրը, որը պաշտոնապես հայտարարել է ազգային էներգետիկ արտակարգ դրություն՝ Մերձավոր Արևելքի հակամարտության պատճառով, գրում է BBC-ն։
Երկիրն իր նավթի 98%-ը ներմուծում է Պարսից ծոցից, և ֆիլիպինցի սպառողները վերջին երեք շաբաթների ընթացքում արդեն բախվել են վառելիքի գների բազմակի բարձրացման․ դիզելային վառելիքի և բենզինի գները կրկնապատկվել են պատերազմի սկսվելուց ի վեր։
Գործադիր հրամանագրում նախագահ Ֆերդինանդ Մարկոս կրտսերը նշել է երկրի էներգամատակարարմանը սպառնացող «անխուսափելի վտանգի» մասին՝ ասելով, որ հռչակագիրը կառավարությանը կտա իրավական լիազորություններ՝ էներգետիկ կայունությունն ապահովելու և տնտեսությունը պաշտպանելու համար միջոցներ ձեռնարկելու նպատակով։
Հրամանագրի համաձայն՝ ստեղծվել է հանձնաժողով, որը կվերահսկի վառելիքի, սննդի, դեղորայքի և այլ անհրաժեշտ ապրանքների կանոնավոր բաշխումը: Կառավարությունը նաև լիազորված է ուղղակիորեն գնել վառելիք և նավթամթերք՝ պաշարները համալրելու համար։
Երեքշաբթի էներգետիկայի նախարարը հայտարարել է, որ Ֆիլիպիններում վառելիքի պաշարները բավարար են մոտավորապես 45 օրվա համար՝ ներկայիս սպառման մակարդակով։
Հրամանն ուժի մեջ կմնա մեկ տարի, եթե նախագահն այն չերկարաձգի կամ չեղյալ չհայտարարի։
Թարգմանությունը՝ Էմմա Չոբանյանի
