Աննա Մկրտչյանն ու ՔՊ-ականները վիրավորում են միմյանց․ ՏԵՍԱՆՅՈՒԹ

Ազգային ժողովում հայտարարությունների ժամին «Պատիվ ունեմ» խմբակցության պատգամավոր Աննա Մկրտչյանը հանդես է եկել կոշտ քննադատությամբ՝ անդրադառնալով Սահմանադրության հնարավոր փոփոխություններին։

Նա պնդել է, որ ամիսներ շարունակ բարձրաձայնել է՝ իշխանությունները պատրաստվում են փոփոխությունների, որոնք, իր գնահատմամբ, միտված են «հայկական պետականության հիմքերի թուլացմանը»։ Պատգամավորի խոսքով՝ նախկինում հանրությանը վստահեցվել է, թե Սահմանադրության նախաբանը և Անկախության հռչակագրին հղումը փոփոխության չեն ենթարկվելու, սակայն այժմ, ըստ նրա, իրավիճակը փոխվել է։

«Ակնհայտ է, որ մայր օրենքի մեջ փոփոխության է ենթարկվում մի բան՝ անում են ամեն ինչ, որպեսզի որևէ բան չհուշի, որ դա հայկական պետականության Սահմանադրություն է»,- նշել է Մկրտչյանը։

Պատգամավորը նաև պնդել է, որ փոփոխությունները կապված են արտաքին ազդակների հետ՝ նշելով, թե դա «հանձնարարական է եղել Ադրբեջանի կողմից»։ Նրա ձևակերպմամբ՝ իշխանությունները պատրաստակամ են կատարել այդ պահանջները։

Մկրտչյանը զուգահեռ է անցկացրել Արցախի շուրջ զարգացումների հետ՝ նշելով, որ, իր կարծիքով, կիրառվում է նույն «սխեման»։

«Ձեզ ասում էին՝ պիտի իջեցնենք նշաձողը, արդյունքում զրոյացրեցին Արցախի Հանրապետությունը։ Հիմա ասում են՝ պիտի իջեցնենք Սահմանադրության նշաձողը, արդյունքում զրոյացնելու են Հայաստանի Հանրապետությունը»,- ասել է նա։

Ելույթից հետո Մկրտչյանի և ՔՊ-ական պատգամավորների միջև լեզվակռիվ է սկսվել՝ փոխադարձ վիրավորանքներով։

Մանրամասները՝ տեսանյութում։