17.08.2026 | 23:08
Զորականում և Ամասիայում շչակներ են փորձարկվելու
Դիվանագիտական կարճատեսության ցցուն և աններելի ակտ․ Գալստյանը՝ Գարեգին Բ-ին Վրաստան մեկնել չթույլատրելու մասին․ ՏԵՍԱՆՅՈՒԹ
Քաղաքականություն
24.03.2026 | 17:09
«Սիրելի հայրենակիցներ, երեկ Վրաստանը վերջին հրաժեշտը տվեց Իլյա Երկրորդին։ Եռօրյա սգո ընթացքում վրաց ժողովուրդը իր ցավն ու ակնածանքը դրսևորեց պատրիարքի նկատմամբ՝ միաժամանակ իր խոնարհումը բերելով 326 թվականից պետական հռչակած իր կրոնի և եկեղեցու նկատմամբ»,- ԱԺ հայտարարությունների ժամին հայտարարել է «Հայաստան» դաշինքի պատգամավոր Լիլիթ Գալստյանը՝ շեշտելով, որ անընդունելի էր Գարեգին Բ-ի բացակայությունը։
«Գարեգին Բ-ին քննիչը չարտոնեց մեկնել Հայաստանից, սա պաշտոնապես է, բայց մի՞թե ակնհայտ չէ, որ չարտոնեց անձամբ Փաշինյանը, քանզի նա է Կառավարությունը, միաժամանակ՝ գլխավոր դատախազը, հոգևոր բարենորոգիչը, կադրերի բաժնի վարիչն ու քրեական գործեր կարճողը։ Վաղուց հեգնական ավարտ ունեցող սարսափի և մղձավանջի ֆիլմ հիշեցնող մեր իրականության մեջ ոչինչ այլևս չի զարմացնում։ Եվ այնուամենայնիվ, չեմ կարող ցավով և ամոթով չարձանագրել, որ այս կամայական և ապօրինի որոշումը ոչ միայն հայ առաքելական եկեղեցու նկատմամբ փոքրության, փոքրոգության և վրեժխնդրության հերթական քայլն է, այլև արգահատելի վերաբերմունք՝ եղբայրական վրաց ժողովրդի և նրա կորստի նկատմամբ։
Սա նաև դիվանագիտական կարճատեսության դրսևորում և աններելի ակտ է տարածաշրջանում դարավոր բարեկամ երկրի՝ սեփական եկեղեցու բացառիկությունը գնահատող վրաց ժողովրդի հանդեպ»,- ասաց նա։
Մանրամասները՝ տեսանյութում։
