17.08.2026 | 23:08
Զորականում և Ամասիայում շչակներ են փորձարկվելու
Թրամփի հայտարարությունից 15 րոպե առաջ, որը նավթի գների կտրուկ անկման պատճառ դարձավ, ֆյուչերսների գործարքների կասկածելի աճ է գրանցվել. FT
Քաղաքականություն
24.03.2026 | 14:44
Թրեյդերները նավթի շուկայում գրեթե կես միլիարդ դոլարի խաղադրույքներ են կատարել շուրջ 15 րոպե առաջ՝ նախքան ԱՄՆ նախագահը գրառում կաներ Իրանի հետ հաջող բանակցությունների մասին: Ըստ The Financial Times-ի՝ խոսքը Brent և West Texas Intermediate նավթի 6200 ֆյուչերսային պայմանագրերի մասին է, գրում է The Insider-ը։
Դոնալդ Թրամփի գրառումից հետո նավթի գները կտրուկ անկում ապրեցին, և ֆոնդային ինդեքսները սկսեցին բարձրանալ: Սակայն այս թափը տևեց միայն մինչև իրանական լրատվամիջոցների կողմից հայտարարությունը, որ բանակցություններ տեղի չեն ունեցել: Դրանից հետո նավթի ֆյուչերսները կրկին աճեցին:
Անհասկանալի է՝ այս ամենի հետևում կանգնած է մե՞կ, թե՞ մի քանի ընկերություն։ Այնուամենայնիվ, FT-ի հետ զրուցած փորձագետները նշել են, որ միջադեպը հարցեր է առաջացնում։ Թրամփի վարչակազմը հերքում է նախագահի հայտարարության նախապատրաստման վերաբերյալ տեղեկատվության արտահոսքը։
«Սպիտակ տունը չի հանդուրժի, որ վարչակազմի որևէ պաշտոնյա անօրինական շահույթ ստանա ներքին տեղեկատվությունից, և ցանկացած անհիմն մեղադրանք այն մասին, որ պաշտոնյաները զբաղվում են նման գործունեությամբ, անհիմն և անպատասխանատու է»,- ասել է մամուլի ծառայության ներկայացուցիչ Քուշ Դեսային։
Միաժամանակ, ըստ FT-ի ներդրումային շուկայի աղբյուրների՝ սա խոշոր գործարքների բազմաթիվ օրինակներից միայն մեկն է, որոնք արվել են անսովոր հարմար ժամանակ՝ ԱՄՆ իշխանությունների պաշտոնական հայտարարություններից առաջ։
Թարգմանությունը՝ Էմմա Չոբանյանի
