Ցավում եմ Հրայր Թովմասյանի համար․ Վլադիմիր Վարդանյան․ ՏԵՍԱՆՅՈՒԹ

«Ես ցավում եմ Հրայր Թովմասյանի և՛ լիազորությունների վաղաժամկետ դադարի համար, և՛ ամբողջ այս ոդիսականի համար․ մեր նմանությունը միայն հետևյալում է, որ երկուսս էլ Պետաիրավական հարցերի մշտական հանձնաժողովի նախագահի կարգավիճակից գնում ենք Սահմանադրական դատարան»,- Ազգային ժողովում այս մասին հայտարարեց Վլադիմիր Վարդանյանը՝ պատասխանելով անկախ պատգամավոր Թագուհի Թովմասյանի հարցին։

Թագուհի Թովմասյանն ասաց՝ քննադատել են Սահմանադրական դատարանի այն դատավորին, որի դեմ ամբողջ իշխանությունը պայքարում էր․ խոսքը Հրայր Թովմասյանի մասին է․ «Եվ Ձեր քննադատության հիմնական շեշտադրումն այն էր, որ Հրայր Թովմասյանը Հանրապետական կուսակցության անդամ է եղել, հետո դարձել է Սահմանադրական դատարանի դատավոր, հետո նախագահ, և նա չի կարող լինել անաչառ դատավոր»։

Վլադիմիր Վարդանյանը նշեց, որ Սահմանադրական դատարանի դատավորներից առնվազն հինգը գնացել են Սահմանադրական դատարան անմիջապես խորհրդարանից, և երբեք դա հարց չի առաջացրել. նրանց թվում էին Կիմ Բալայանը, Արևիկ Պետրոսյանը, Ռաֆայել Պապայանը։

«Հրայր Թովմասյանի հետ կապված հիմնական խնդիրը ոչ նրանում էր, որ վերջինս խորհրդարանից տեղափոխվում է Սահմանադրական դատարան, որքան նրանում, որ լինելով Սահմանադրության նոր տեքստի ջատագով, խոսելով այն մասին, որ սահմանադրական նոր կարգավորումներն ավելի ժողովրդավարական են, ըստ էության, լինելով Սահմանադրության «Այո»-ի շտաբի կարևորագույն դերակատարներից մեկը, այդուհանդերձ, իր իսկ կողմից կերտված Սահմանադրությունը (սա ամենայն հարգանքով եմ ասում) թողնում է մի կողմ և ընտրվում է այն սահմանադրական կարգավորումների համաձայն, որոնք օրեր անց պետք է դադարեն գոյություն ունենալ»,- նշեց Վարդանյանը։

Մանրամասները՝ տեսանյութում։