ՍԴ դատավորի թեկնածուին չի կարող նման հարց տրվել, եթե նպատակը հունից հանելը կամ պրովոկացիան չէ. Վլադիմիր Վարդանյան․ ՏԵՍԱՆՅՈՒԹ

Ազգային ժողովում ՍԴ դատավորի պաշտոնում Վլադիմիր Վարդանյանին ընտրելու հարցի քննարկման ժամանակ նրանց հարց ուղղեց դաշնակցական պատգամավոր Արմենուհի Կյուրեղյանը։ Նա հետաքրքրվեց՝ քաղաքական գործիչը պե՞տք է ազատվի աշխատանքից, որովհետև ինքը կառավարության արտաքին քաղաքականության դեմ գործողություն է իրականացնում՝ հիշեցնելով ինչպես Ցեղասպանության թանգարան-ինստիտուտի տնօրենի, այնպես էլ Վարդանյանի՝ նախկինում արված հայտարարությունը։

«Համոզված եմ, որ գործ ունենք Արցախում մարդկության դեմ ուղղված հանցագործության հետ, և ես պնդում եմ ու շարունակելու եմ անել ամեն ինչ, որ միջազգային ցանկացած հարթակում սատարեմ այն թեզը, որ Ադրբեջանը կատարել է լրջագույն հանցագործություններ, և դրա համար համապատասխան պատիժ պետք է տրվի: Նաև անդրադառնալու եմ Ադրբեջանի կողմից մտացածին մեղադրանքներով ապօրինաբար ձերբակալվող էթնիկ հայերին: Հավատացնում եմ, որ ցանկացած նման դեպք արժանանալու է միջազգային համապատասխան արձագանքի, ցանկացած միջազգային հարթակում, որտեղ մենք կհայտնվենք, մենք խոսելու ենք դրա մասին և պահանջելու ենք, որ Ադրբեջանի քաղբանտարկյալների առանց այդ էլ երկար շարքը չհամալրվի մեր հայրենակիցներով»,- ավելի վաղ հայտարարել էր Վլադիմիր Վարդանյանը։

ՍԴ դատավորի թեկնածուն նշեց՝ իրեն նման հարց տրվել չի կարող, քանի որ այն վերաբերում է Հայաստանի Հանրապետության արտաքին քաղաքականությանը, եթե այն չի հետապնդում մեկ պարզ նպատակ՝ իրեն «հունից հանել կամ կազմակերպել փոքրիկ ընկերական պրովոկացիա»:

Մանրամասները՝ տեսանյութում։