27.04.2026 | 12:02
Ռուսական զորքերը զանգվածային հարված են հասցրել Օդեսային. վիրավորվել է 11 մարդ, այդ թվում`2 երեխա
Կոլումբիայում ռազմական ինքնաթիռի վթարի հետևանքով առնվազն 66 զոհ կա
Քաղաքականություն
24.03.2026 | 10:59
Կոլումբիայի ռազմական ինքնաթիռը, որը տեղափոխում էր 125 զինվորականի և անձնակազմի անդամի, կործանվել է թռիչքի ժամանակ, որի հետևանքով զոհվել է առնվազն 66 մարդ։ Տասնյակ վիրավորներ կան, հայտնել են պաշտոնյաները, գրում է Le Monde-ը։
C-130 Hercules ինքնաթիռը կործանվել է Պուերտո Լեգուիզամոյից թռիչքից կարճ ժամանակ անց՝ Էկվադորի և Պերուի հետ հարավային սահմանին մոտ: Ռազմական աղբյուրը AFP-ին հայտնել է, որ զոհվել է 58 զինվորական, ինչպես նաև ռազմաօդային ուժերի վեց աշխատակից և երկու ոստիկան։ Թարմացված թիվը հայտնի է դարձել այն բանից հետո, երբ տեղական կառավարության քարտուղար Կառլոս Կլարոսը RCN հեռուստատեսությանը հայտնել է, որ զոհվել է 33 մարդ, և որ ջանքեր են գործադրվում տասնյակ վիրավորների բուժման և տարհանման համար: Նա հավելել է, որ քննիչները հետաքննում են վթարի պատճառը։
Վերջին շաբաթների ընթացքում սահմանային գոտին, որտեղ ինքնաթիռը կործանվել է, եղել է ռազմական ակտիվության թատերաբեմ, քանի որ կոլումբիացի և էկվադորցի զինվորականները փորձում են պայքարել թմրանյութերի առևտրով զբաղվող կարտելների և զինյալների դեմ:
Պաշտպանության նախարար Պեդրո Սանչեսը ցավակցություն է հայտնել աղետի կապակցությամբ՝ ասելով, որ դեռ վաղ է որոշել վթարի պատճառը։
Գեներալ Կառլոս Ֆեռնանդո Սիլվա Ռուեդան ասել է, որ ինքնաթիռում եղել է 114 զինծառայող և անձնակազմի 11 անդամ, որոնք Պուերտո Լեգուիսամոյից ուղևորվում էին Ամազոնի մոտակա դիրքերից մեկը։
«Օդանավակայանը փոքր է, և կան մի շարք դժվարություններ, որոնք խոչընդոտում են մարմինների և վիրավորների տարհանմանը»,- Facebook-ում հրապարակված տեսանյութում ասել է Պուտամայո շրջանի նահանգապետ Ջոն Գաբրիել Մոլինան։
Կոլումբիայի նախագահ Գուստավո Պետրոն հրապարակել է կադրեր, որտեղ երևում է, թե ինչպես է ինքնաթիռը փորձում բարձրություն հավաքել։ Նա ինքնաթիռի աղետը որակել է «սարսափելի վթար» և ընդգծել Կոլումբիայի ռազմական տեխնիկայի արդիականացման անհրաժեշտությունը, չնայած վթարը կոնկրետ չի կապել ինքնաթիռի վիճակի հետ։
Սա Lockheed Martin-ի կողմից արտադրված C-130 Hercules ինքնաթիռի երկրորդ վթարն է Հարավային Ամերիկայում մեկ ամսից էլ պակաս ժամանակահատվածում։ Փետրվարի 27-ին Լա Պասի մոտակայքում վայրէջքի ժամանակ վթարի էր ենթարկվել թղթադրամներ տեղափոխող բոլիվիական ռազմական բեռնատար ինքնաթիռը, որի հետևանքով զոհվել էր առնվազն 24 մարդ։
Թարգմանությունը՝ Էմմա Չոբանյանի
