09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Թրամփը պնդում է, որ Իրանը համաձայնել է միջուկային զենք չստեղծել
Քաղաքականություն
23.03.2026 | 20:24
ԱՄՆ նախագահ Դոնալդ Թրամփը պնդում է, թե Իրանը համաձայնել է չստեղծել միջուկային զենք։ BBC-ի ռուսական ծառայության հաղորդմամբ՝ նա այս մասին լրագրողներին հայտարարել է Ֆլորիդայի օդանավակայանում։ Թրամփի խոսքով՝ Իրանը ցանկանում է գործարք կնքել և ԱՄՆ-ն պատրաստ է։
«Եթե ամեն ինչ լավ ստացվի, Հորմուզի նեղուցը շուտով կբացվի»,- ասել է նա՝ հավելելով․ «Նավթի գինը քարի պես կընկնի, երբ համաձայնագիրը կնքվի»։
Թրամփի խոսքով՝ երկու կողմերը կիրակի բանակցություններ են վարել և համաձայնության են եկել «գրեթե ամեն ինչի» շուրջ, և այդ բանակցությունները կշարունակվեն երկուշաբթի։ Թրամփը պնդում է, որ Իրանը դրանք սկսել է՝ կանխելու համար երկրի ամենամեծ էլեկտրակայանին հարվածը, «որի կառուցումն արժեցել է ավելի քան 10 միլիարդ դոլար»։ ԱՄՆ-ն սպառնացել էր հարվածել էլեկտրակայաններին, եթե Հորմուզի նեղուցը չբացվի 48 ժամվա ընթացքում։
«Դրա համար նրանք զանգահարեցին։ Ես չեմ զանգահարել, նրանք են զանգահարել»,- հավելել է Թրամփը։
Truth Social-ում նա գրել էր, որ ԱՄՆ-ն և Իրանը վերջին երկու օրերի ընթացքում «շատ լավ և արդյունավետ բանակցություններ» են վարել, և որ ԱՄՆ-ը հինգ օրով հետաձգում է իրանական էլեկտրակայաններին և էներգետիկ ենթակառուցվածքներին հարվածները։
Իրանի նախագահ Մասուդ Փեզեշքիանը, հղում անելով երկրի արտաքին գործերի նախարարությանը, հայտարարել է, որ Թեհրանը բանակցություններ չի վարում ԱՄՆ-ի հետ։
Թարգմանությունը՝ Էմմա Չոբանյանի
