06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
Թուրքիան միացել է Եգիպտոսի և Պակիստանի՝ ԱՄՆ-Իրան ճգնաժամի կարգավորման միջնորդական ջանքերին. Axios
Քաղաքականություն
23.03.2026 | 22:23
Թուրքիան միացել է Եգիպտոսի և Պակիստանի միջնորդական ջանքերին՝ Միացյալ Նահանգների և Իրանի միջև Հորմուզի նեղուցի շուրջ լարվածության սրման ֆոնին, մինչ ԱՄՆ նախագահ Դոնալդ Թրամփը հետաձգել է Իրանի դեմ նախատեսված ռազմական հարվածները, հաղորդում է Axios-ը։ Միջնորդական ջանքերը ձեռնարկվում են այն ժամանակ, երբ Վաշինգտոնն ու Թեհրանը, կարծես, հետ են քաշվում հետագա սրումից, գրում է Turkish Minute-ը։
Երկուշաբթի Դոնալդ Թրամփը հայտարարել է, որ հրամայել է հնգօրյա դադար վերցնել Իրանի էներգետիկ ենթակառուցվածքների դեմ հնարավոր հարվածների հարցում։ Որոշումը կայացվել է շաբաթավերջին Թրամփի կողմից ներկայացված վերջնագրից հետո, որում նա զգուշացրել էր, որ Միացյալ Նահանգները 48 ժամվա ընթացքում հարձակումներ կձեռնարկի, եթե Իրանը չվերաբացի Հորմուզի նեղուցը։
Իրանը պատասխանել է Իսրայելի և Պարսից ծոցի երկրների էլեկտրաէներգիայի ենթակառուցվածքները թիրախավորելու սպառնալիքներով։
Այս ֆոնին Թուրքիան հանդես է եկել որպես ակտիվ դիվանագիտական միջնորդ։ Ամերիկյան աղբյուրն Axios-ին հայտնել է, որ վերջին երկու օրերի ընթացքում Թուրքիան, Եգիպտոսը և Պակիստանը Վաշինգտոնի և Թեհրանի միջև հաղորդագրություններ են փոխանակել լարվածությունը նվազեցնելու ջանքերի շրջանակում։
Նշվում է, որ երեք երկրների արտաքին գործերի նախարարներն առանձին բանակցություններ են ունեցել Սպիտակ տան դեսպան Սթիվ Ուիթկոֆի և Իրանի արտաքին գործերի նախարար Աբբաս Արաղչիի հետ՝ համակարգված ջանքեր գործադրելով հաղորդակցության ուղիները բացելու ուղղությամբ։
Առանձին, Թուրքիայի արտաքին գործերի նախարար Հաքան Ֆիդանը նույնպես զբաղվել է ինտենսիվ դիվանագիտությամբ: Թուրքական դիվանագիտական աղբյուրը Reuters-ին հայտնել է, որ Ֆիդանը հեռախոսազրույցներ է ունեցել Արաղչիի, Եգիպտոսի արտաքին գործերի նախարար Բադր Աբդելաթիի, ԵՄ արտաքին քաղաքականության պատասխանատու Կայա Կալլասի և ԱՄՆ պաշտոնյաների հետ՝ պատերազմը դադարեցնելու քայլերը քննարկելու համար։ Այս դիվանագիտական շփումները տեղի են ունենում այն ժամանակ, երբ համաշխարհային շուկաները կտրուկ են արձագանքում ճգնաժամի զարգացումներին։
Truth Social-ում գրառման մեջ Թրամփը նշել էր, որ Միացյալ Նահանգները և Իրանը վերջին երկու օրերի ընթացքում շատ լավ և արդյունավետ զրույց են ունեցել՝ նշելով, որ հետագա գործողությունները կախված կլինեն ընթացող բանակցությունների արդյունքից։ Իրանը, սակայն, հերքել է որևէ ուղղակի բանակցությունների անցկացումը։
Միջնորդական ջանքերին ծանոթ աղբյուրն Axios-ին հայտնել է, որ քննարկումները կենտրոնացած են ռազմական գործողությունների դադարեցման և չլուծված հարցերի լուծման վրա՝ հավելելով, որ առաջընթաց է գրանցվել։
Եգիպտոսի արտաքին գործերի նախարար Աբդելաթին ևս հեռախոսազրույցներ է ունեցել Ուիթկոֆի, Արաղչիի և Թուրքիայի, Պակիստանի և Կատարի նրա գործընկերների հետ՝ ընդգծելով հակամարտությունը զսպելու և դրա տարածումը կանխելու անհրաժեշտությունը, հայտնել է Եգիպտոսի արտաքին գործերի նախարարությունը։
Սպիտակ տունն անմիջապես չի արձագանքել Axios-ի մեկնաբանության խնդրանքին։
Թարգմանությունը՝ Էմմա Չոբանյանի
