Թրամփի հայտարարությունից հետո նավթի գները կտրուկ նվազել են

Նավթի գներն անկում են ապրել, երբ ԱՄՆ նախագահ Դոնալդ Թրամփը հայտարարել է, որ Պենտագոնին հանձնարարել է հինգ օրով հետաձգել Իրանի էլեկտրակայանների և էներգետիկ ենթակառուցվածքների վրա հարվածները։ Լոնդոնի ICE բորսայում Brent տեսակի նավթի հունիսյան ֆյուչերսների գինը 108,20 դոլարից կտրուկ նվազել է մինչև 93 դոլար։ Հետագայում նավթը վերականգնել է իր կորուստների մի մասը, սակայն Մոսկվայի ժամանակով 15:00-ի դրությամբ՝ այն դեռևս 100 դոլարից ցածր էր, գրում է Meduza-ն։

Bloomberg-ի տվյալներով՝ ամերիկյան WTI հում նավթի և բնական գազի գները նույնպես նվազել են եվրոպական բորսաներում։ Մոսկվայի բորսայի ինդեքսը նվազել է 1,9%-ով՝ հասնելով 2810.3 կետի՝ համընկնելով մարտի սկզբի մակարդակի հետ։

Փետրվարի 28-ին ԱՄՆ-ն ու Իսրայելը սկսեցին հարվածել Իրանին, Իրանն իր հերթին հրթիռներ և անօդաչու թռչող սարքեր արձակեց ԱՄՆ-ի դաշնակից Պարսից ծոցի երկրների ուղղությամբ։ Իրանը նաև հայտարարում է Հորմուզի նեղուցի փակման մասին, որի միջով անցնում է աշխարհի նավթի մատակարարումների մեկ քառորդը։

Աշխարհում գների աճը դանդաղեցնելու համար ԱՄՆ-ը ժամանակավորապես մեղմացրել է ռուսական և իրանական նավթի նկատմամբ պատժամիջոցները։ ԱՄՆ ֆինանսների նախարար Սքոթ Բեսենթը պատժամիջոցների մեղմացումից Ռուսաստանի շահույթը գնահատել է շուրջ 2 միլիարդ դոլար։ Նրա խոսքով՝ սա համարժեք է այն գումարին, որը Ռուսաստանի բյուջեն ծախսում է մեկ օրում։

Թարգմանությունը՝ Էմմա Չոբանյանի