Թրամփը հայտարարել է, որ ուրախ է նախկին դատախազ Ռոբերտ Մյուլերի մահվան կապակցությամբ

ԱՄՆ նախագահ Դոնալդ Թրամփը ուրախությամբ է արձագանքել նախկին հատուկ դատախազ Ռոբերտ Մյուլերի մահվանը, ով նախկինում հետաքննում էր Թրամփի ընտրարշավի հնարավոր կապերը Ռուսաստանի հետ՝ Սպիտակ տան ղեկավարի պաշտոնում նրա առաջին ժամկետի ընթացքում։

«Ռոբերտ Մյուլերը հենց նոր մահացավ։ Լավ է, ես ուրախ եմ, որ նա մահացել է։ Նա այլևս չի կարող վնասել անմեղ մարդկանց»,- գրել է Թրամփը շաբաթ օրը՝ մարտի 21-ին, Truth Social սոցիալական ցանցում։

Նախկին հատուկ դատախազը մահացել է 82 տարեկանում։ Մահվան պատճառը դեռ չի հաղորդվում։ Մյուլերը երկար ժամանակ տառապում էր Պարկինսոնի հիվանդությամբ։

2001-2013 թվականներին Ռոբերտ Մյուլերը զբաղեցրել է Հետաքննությունների դաշնային բյուրոյի (ՀԴԲ) տնօրենի պաշտոնը։ 2017 թվականին ԱՄՆ արդարադատության նախարարությունը նրան նշանակել էր հատուկ դատախազ՝ 2016 թվականի նախագահական ընտրություններին Ռուսաստանի ենթադրյալ միջամտության գործը հետաքննելու համար, որոնցում հաղթել էր Թրամփը։

2019 թվականի մարտի վերջին Մյուլլերի աշխատանքի արդյունքները հրապարակվել էին ԱՄՆ-ում, սակայն միայն մասնակի։ ԱՄՆ գլխավոր դատախազ և արդարադատության նախարար Ուիլյամ Բարը, Կոնգրեսում ներկայացնելով հետաքննության կարճ արդյունքները, հայտարարել էր, որ Թրամփին համարում է անմեղ՝ Ռուսաստանի հետ կապերի հարցում։ Ինքը՝ Մյուլերը, հետագայում նշել էր, որ իր թիմի հավաքած փաստերը թույլ չեն տալիս այս հարցի վերաբերյալ վերջնական եզրակացություն անել։

ԱՄՆ նախկին նախագահ Բարաք Օբաման, որի նախագահության տարիներին Մյուլերը ղեկավարում էր ՀԴԲ-ն, նրան անվանել է «կազմակերպության պատմության լավագույն տնօրեններից մեկը»։

«Իր անխոնջ նվիրվածությունը օրենքի գերակայությանը և հիմնարար արժեքների նկատմամբ անսասան հավատը նրան դարձրել են մեր ժամանակների ամենահարգված պետական ծառայողներից մեկը»,- հավելել է Օբաման։

Նախկին նախագահ, հանրապետական Ջորջ Բուշ կրտսերը, ով ժամանակին առաջադրել էր Մյուլերին այդ պաշտոնում, հայտարարել է, որ «խորապես վշտացած է» նրա մահվան կապակցությամբ և գովել նրան՝ «կյանքը պետական ծառայությանը նվիրելու համար»։