15.04.2026 | 23:15
Մրգաշենում սպանություն կատարած եղբայրները կալանավորվել են. ՔԿ
Ունենք պատմական հնարավորություն Հարավային Կովկասը դարձնելու տարածաշրջաններն իրար կապող կամուրջ. Տաթևիկ Գասպարյան
Քաղաքականություն
20.03.2026 | 20:28
Բրյուսելում տեղի է ունեցել ԵՄ-Հայաստան խորհրդարանական գործընկերության կոմիտեի հինգերորդ նիստը, որին մասնակցել է ՀՀ ԱԺ պատվիրակությունը: Նիստում ելույթ է ունեցել ՀՀ ԱԺ պատվիրակության անդամ Տաթեւիկ Գասպարյանը:
«Հարգելի՛ համանախագահներ,
Հարգելի՛ գործընկերներ,
Ուրախ եմ մասնակցել ԵՄ-Հայաստան խորհրդարանական գործընկերության կոմիտեի հինգերորդ նիստին մի ժամանակահատվածում, երբ մեր գործընկերությունը ոչ միայն խորանում է, այլեւ դառնում է առավել ռազմավարական: Կցանկանայի անդրադառնալ ընդդիմադիր գործընկերներ պարոն Խաչատրյանի եւ պարոն Մամիջանյանի կողմից խաղաղության գործընթացի վերաբերյալ հնչեցրած դիտարկումներին: Պարո՛ն Խաչատրյան, պարո՛ն Մամիջանյան, դուք շատ լավ գիտակցում եք, որ արդեն հաստատված խաղաղությունն այն արժեքն է, որի մասին մեր ժողովուրդը երազել էր տասնամյակներ շարունակ: Դա, իսկապես, անգնահատելի է, քանի որ այն ընձեռում է նոր հնարավորություններ մեր երկրի զարգացման համար: Դուք նաեւ գիտեք, որ ձեր կողմից բարձրաձայնված հարցերը նախատեսված են լուծվել սահմանազատման գործընթացի շրջանակում եւ խաղաղության գործընթացի տրամաբանության մեջ: Այդուհանդերձ, դուք միտումնավոր խեղաթյուրում եք իրականությունը՝ նպատակ ունենալով վարկաբեկել Հայաստան-Ադրբեջան խաղաղության գործընթացը եւ կասկած սերմանել հանրության շրջանում Կառավարության՝ երկրի զարգացմանն ու խաղաղ առաջընթացին միտված քայլերի նկատմամբ: Տասնամյակներ շարունակ մեր տարածաշրջանը նույնացվել է հակամարտությունների, փակ սահմանների եւ բաց թողնված հնարավորությունների հետ: Այսօր Հայաստանը հանձնառու է շրջելու այդ էջը՝ առաջ մղելով մի տեսլական, որտեղ ապաշրջափակումը փոխարինում է մեկուսացմանը, իսկ համագործակցությունը՝ առճակատմանը:
«Խաղաղության խաչմերուկ» նախաձեռնությունն արտահայտում է հենց այդ ձգտումը: Այն պարզապես ենթակառուցվածքային նախագիծ չէ. այն քաղաքական տեսլական է՝ բաց սահմանների, գործող հաղորդուղիների եւ տարածաշրջանային ինտեգրման մասին՝ հիմնված ինքնիշխանության ու իրավազորության լիարժեք հարգանքի վրա: Այս համատեքստում TRIPP նախագիծը ներկայացնում է հստակ առաջընթաց: Նոր տրանսպորտային եւ տարանցիկ ուղիների ստեղծմամբ այն ունի հստակ ներուժ՝ միավորելու Հարավային Կովկասն ավելի լայն տարածաշրջանային եւ միջազգային ցանցերի հետ՝ մոտեցնելով Եվրոպան Կենտրոնական Ասիային եւ դրանից էլ անդին: Լիովին համակարծիք եմ իմ գործընկեր պարոն Եղոյանի հետ առ այն, որ հաղորդուղիների գործարկումը միայն ճանապարհների մասին չէ: Այն վստահության ձեւավորման մասին է, խաղաղության պահպանման մասին է, այն խաղաղությունն ամրապնդող անկախության մասին է, եւ, իհարկե, այն նաեւ տնտեսական հնարավորությունների ստեղծման մասին է, որոնցից կարող են օգտվել տարածաշրջանային բոլոր երկրները եւ ոչ միայն:
Այսպիսով, հարգելի՛ գործընկերներ, մենք ունենք պատմական հնարավորություն՝ Հարավային Կովկասը դարձնելու տարածաշրջաններն իրար կապող կամուրջ՝ վերածելով այն անորոշության տարածքից համագործակցության տարածքի: Հայաստանը պատրաստ է առաջ շարժվել այս ճանապարհով գործընկերների հետ, որոնք հավատում են խաղաղությանը, հավատում են ապաշրջափակմանը, ընդհանուր արժեքներին եւ ապագային:
Շնորհակալություն»,- նշել է պատգամավորը:
