02.07.2026 | 18:10
ԵՀ նախագահը մեկնեց Երևանից // Պետական գաղտնիքի հրապարակման գործով գնդապետ է ձերբակալվել․ ԼՈՒՐԵՐ
ԱՄՆ-ը դիտարկում է Խարգ կղզու օկուպացիայի կամ շրջափակման հարցը. Axios
Քաղաքականություն
20.03.2026 | 18:27
ԱՄՆ նախագահ Դոնալդ Թրամփի վարչակազմը քննարկում է Իրանի Խարգ կղզու օկուպացիայի կամ շրջափակման ծրագրերը Իրանի վրա ճնշում գործադրելու համար՝ Հորմուզի նեղուցը վերաբացելու նպատակով։ Այս մասին հաղորդում է Axios-ը՝ հղում անելով իր աղբյուրներին, գրում է BBC-ի ռուսական ծառայությունը։
Իրանական նավթի արտահանման 90 տոկոսն անցնում է Խարգ կղզով։ ԱՄՆ-ն նախկինում հարվածել է կղզուն։ Հարվածի մասին հայտարարելով՝ Թրամփը շեշտել է, որ նավթի հետ կապված ենթակառուցվածքները թիրախավորված չեն եղել, այլ թիրախում եղել են ռազմական օբյեկտները։ Իրանի իշխանություններն էլ պնդել են, որ նավթային ենթակառուցվածքներ չեն վնասվել։
Իրանի ափից 24 կիլոմետր հեռավորության վրա գտնվող կղզու գրավման գործողությունը, սակայն, կարող է ամերիկյան ուժերին ուղղակի հարձակման տակ դնել, և այն կարող է սկսվել միայն այն բանից հետո, եթե ամերիկյան զինվորականներն ավելի թուլացնեն Իրանի ռազմական կարողությունները Հորմուզի նեղուցում, Axios-ին հայտնել են աղբյուրները։
«Մեզ մոտ մեկ ամիս կպահանջվի, որպեսզի հարվածներով ավելի թուլացնենք իրանցիներին, գրավենք կղզին, ապա նրանց ձեռքից բռնենք և դա օգտագործենք բանակցությունների համար»,- հայտնել է Սպիտակ տան դիրքորոշմանը ծանոթ աղբյուրը։
Նման գործողությունը, եթե հաստատվի, կպահանջի ԱՄՆ զորքերի թվի ավելացում: Axios-ը հաղորդում է, որ տարածաշրջանում արդեն ուղևորվում են երեք տարբեր ծովային հետևակի ստորաբաժանումներ: ԱՄՆ պաշտոնյան ասել է, որ Սպիտակ տունը և Պենտագոնը քննարկում են մոտ ապագայում ավելի շատ զորքեր ուղարկելու հնարավորությունը։
«Մենք միշտ ունեցել ենք ցամաքային ուժեր հակամարտություններում յուրաքանչյուր նախագահի, այդ թվում՝ Թրամփի օրոք։ Գիտեմ, որ սա մեծ ուշադրության է արժանացել լրատվամիջոցների կողմից, և ես հասկանում եմ քաղաքական հետևանքները, բայց նախագահը կանի այն, ինչ ճիշտ է համարում»,- ասել է մեկ այլ աղբյուր։
Այնուամենայնիվ, չնայած Խարգ կղզին կարևոր դեր է խաղում Իրանի նավթարդյունաբերության մեջ, չկա որևէ երաշխիք, որ դրա գրավումը կհամոզի Թեհրանին խաղաղություն կնքել Թրամփի պայմաններով, եզրակացնում է Axios-ը։
Թարգմանությունը՝ Էմմա Չոբանյանի
