Էստոնիան մեղադրել է Ռուսաստանին օդային տարածքի խախտման համար

Ռուսական Սու-30 կործանիչը խախտել է Էստոնիայի օդային տարածքը Բալթիկ ծովում գտնվող Վայնդլոո կղզու շրջանում, հինգշաբթի՝ մարտի 19-ին, հայտնել է երկրի Գլխավոր շտաբը։ Ըստ հրապարակված տվյալների՝ միջադեպը տեղի է ունեցել նախորդ օրը՝ մարտի 18-ին, օրվա երկրորդ կեսին։ ՌԴ ռազմական ինքնաթիռը Էստոնիայի օդային տարածքում գտնվել է մոտ մեկ րոպե՝ առանց թռիչքային պլանի և առանց կապի էստոնական ավիացիոն ծառայությունների հետ, փոխանցում է DW-ն։

Օդային սահմանի խախտմանը արձագանքել է Իտալիայի ռազմաօդային ուժերի ստորաբաժանումը, որը տեղակայված է Էմարի ավիաբազայում՝ ՆԱՏՕ-ի Բալթյան երկրների օդային տարածքի պահպանման առաքելության շրջանակում:

«Էստոնիայի անվտանգության համար սպառնալիք չի եղել»,- հայտարարել է երկրի արտգործնախարար Մարգուս Ցահքնան։ Էստոնիայի ԱԳՆ-ն կանչել է ՌԴ դեսպանատան գործերի ժամանակավոր հավատարմատարին և միջադեպի առնչությամբ նրան հանձնել բողոքի նոտա։

Էստոնիայի վարչապետ Քրիստեն Միխալը X սոցիալական ցանցում գրել է, որ Ռուսաստանի վարքագծի ձևը չի փոխվում։

«ՆԱՏՕ-ն աշխատում է։ Մեր օդային տարածքը մշտապես վերահսկվում, պաշտպանվել և պաշտպանվում է»,- ընդգծել է Միխալը։

2025 թվականի ընթացքում ռուսական մարտական ինքնաթիռները առնվազն չորս անգամ խախտել են հարևան երկրի օդային տարածքը։ Նմանատիպ վերջին դեպքը տեղի է ունեցել սեպտեմբերի 19-ին, երբ ՌԴ ռազմաօդային ուժերի երեք ՄիԳ-31 կործանիչներ առանց թույլտվության 12 րոպե գտնվել են Էստոնիայի օդային տարածքում՝ նույն Վայնդլոո կղզու մոտ։

Միջադեպը դատապարտել են Եվրամիությունը, Ֆրանսիան, Մեծ Բրիտանիան և Գերմանիան։ Գերմանիայի ԱԳ նախարար Յոհանն Վադեֆուլը Ռուսաստանի կողմից օդային տարածքի խախտումը անվանել է «անընդունելի»։

Եվրոպացի քաղաքական գործիչների կողմից հնչել են նաև ավելի կոշտ հայտարարություններ։ Այսպես, Չեխիայի նախագահ Պետր Պավելը սեպտեմբերի 20-ին նշել է, որ ՆԱՏՕ-ի օդային տարածք ներխուժման դեպքում ռուսական ինքնաթիռները կարող են խոցվել՝ հավելելով. «Դա ոչ ոք չի ցանկանում»։