450,000 մարդ. 2025 թվականին ռեկորդային թվով զբոսաշրջիկներ են այցելել Անի

Պատմական հայկական Անիի նկատմամբ հետաքրքրությունը, որը բազմաթիվ քաղաքակրթությունների օրրան է եղել, օրեցօր աճում է: Թուրքական լրատվամիջոցները գրում են, որ ՅՈՒՆԵՍԿՕ-ի համաշխարհային ժառանգության ցանկում ընդգրկված վայրը 2025 թվականին հյուրընկալել է 450,000 զբոսաշրջիկի:

Թուրքական աղբյուրը նշում է, թե Անիի հնագիտական ​​վայրը, որը Կենտրոնական Ասիայից դեպի Մերձավոր Արևելք և Կովկասից դեպի Անատոլիա տանող առաջին դարպասն է, «պարունակում է թուրք-իսլամական ճարտարապետության 11-րդ և 12-րդ դարերի ստեղծագործություններ»։ Հայկական կոթողների, ժառանգության մասին չի նշվում:

Ասվում է, թե պատմության ընթացքում այս վայրը կառավարվել է Բագրատունիների դինաստիայի, Բյուզանդիայի, Մեծ Սելջուկյան կայսրության, Վրաց թագավորության, մոնղոլների, Իլխանյանների, Կարա Կոյունլուների, Ակ Կոյունլուների և Օսմանյան կայսրության կողմից։ Անցյալում քրիստոնյաներն ու մուսուլմաններն ապրել են կողք կողքի այս հնագիտական ​​վայրում։

Վերջին տարիներին օտարերկրյա զբոսաշրջիկների ուշադրությունը գրաված Անին անցյալ տարի այցելել է մոտ 450,000 ներքին և օտարերկրյա այցելուներ, ինչը ռեկորդային թիվ է տարածաշրջանի համար։

Կովկասի համալսարանի դասախոս և Անիի հնագիտական ​​վայրի պեղումների ղեկավար, դոկտոր Մուհամմեթ Արսլանը նաև նշել է, որ վերջին տարիներին Կարսը դարձել է երկրի ամենահայտնի զբոսաշրջային քաղաքներից մեկը։ Ըստ նրա՝ նպատակ ունեն պեղումների, պահպանման և լանդշաֆտային աշխատանքների միջոցով այցելուների թիվը հասցնել շուրջ 1 միլիոնի։

Թարգմանությունը՝ Էմմա Չոբանյանի