Եվրոպան պետք է մասնակցի Ուկրաինայի վերաբերյալ բանակցություններին․ Մերց

Գերմանիայի կանցլեր Ֆրիդրիխ Մերցը պնդում է, որ եվրոպական պետությունները պետք է մասնակցեն Ուկրաինայում խաղաղ կարգավորման վերաբերյալ բանակցություններին։

«Անթույլատրելի է, որ բանակցությունները անցկացվեն Ուկրաինայի և եվրոպացիների գլխավերևում՝ միայն Ռուսաստանի և ԱՄՆ-ի միջև»,- հայտարարել է նա մարտի 18-ին Բունդեսթագում։ Մերցը նաև կոչ է արել ուժեղացնել ճնշումը Մոսկվայի վրա՝ ԱՄՆ-ի և եվրոպական գործընկերների համատեղ ջանքերով, փոխանցում է DW-ն։

Իր կառավարության հայտարարությունում, ԵՄ գագաթնաժողովից առաջ, նա կոչ է արել շտապ համաձայնեցնել Եվրամիությունում Ռուսաստանի դեմ 20-րդ պատժամիջոցների փաթեթը և վերացնել խոչընդոտներն արդեն համաձայնեցված՝ Ուկրաինային տրամադրվող 90 միլիարդ եվրոյի վարկը։ Նրա խոսքով՝ ինքը «հաստատակամորեն» կպայքարի դրա համար մարտի 19-ի գագաթնաժողովում։

«Մենք չենք կարող զիջումներ անել որևէ առանձին երկրի»,- հավելել է նա՝ ակնարկելով Հունգարիայի դիմադրությունը։

Մերցը նաև հայտարարել է, որ Գերմանիան ունի «հավաստի տվյալներ», ըստ որոնց՝ Ռուսաստանի տնտեսությունը «տուժում է այս պատերազմից և պատժամիջոցներից»։ Նրա խոսքով՝ սա այն լծակն է, որի վրա ԵՄ-ն և ԱՄՆ-ն պետք է շարունակեն ճնշում գործադրել։

Կանցլերը նշել է նաև, որ եթե հաջողվի հասնել կայուն խաղաղ կարգավորման Ուկրաինայում, ապա ԱՄՆ-ը հիմնավոր կերպով ակնկալում է եվրոպացիների ներդրումը, սակայն միայն այն դեպքում, եթե նրանք «սկզբից նստեն բանակցությունների սեղանի շուրջ», այդ թվում՝ Ուկրաինայի անվտանգության երաշխիքների հարցում։

Նա ընդգծել է, որ Ուկրաինայում արդար խաղաղության հարցը «ամբողջ տրանսատլանտյան տարածքի անվտանգության, ազատության և խաղաղության հարց է»։ Խոսքը ոչ միայն «մեծ եվրոպական երկրի տարածքային ամբողջականության», այլ նաև «մարդկայնության և արդարության» մասին է։

Մերցի խոսքով՝ Ուկրաինան «վաղուց պատրաստ է խաղաղ բանակցություններին», մինչդեռ Ռուսաստանը «համակարգված կերպով խափանում է դրանց հասնելու բոլոր ջանքերը»՝ շարունակելով դաժան հարվածներ հասցնել խաղաղ բնակչությանը։