Սաուդյան Արաբիան ԱԹՍ է խոցել Ռիադում ԱՄՆ-ի և Թուրքիայի դեսպանատների մոտ

Սաուդյան Արաբիայի պաշտպանության նախարարությունը չորեքշաբթի օրը հայտարարել է, որ անօդաչու թռչող սարք է խոցվել, երբ այն «փորձել է մոտենալ Ռիադում դեսպանատների թաղամասին», որտեղ գտնվում են ԱՄՆ-ի և Թուրքիայի դեսպանատները։ Պաշտոնյաները հայտնել են, որ վերջին ժամերին Սաուդյան Արաբիայի ուժերը բազմաթիվ օդային սպառնալիքներ են որսացել, այդ թվում՝ անօդաչու թռչող սարքեր և բալիստիկ հրթիռ։

Նախարարությունը նաև հայտնել է, որ հակաօդային պաշտպանությունը որսացել և ոչնչացրել է մայրաքաղաքից հարավ գտնվող Ալ-Խարջ նահանգի ուղղությամբ արձակված բալիստիկ հրթիռը։

ՊՆ խոսնակը հայտնել է, որ որսված հրթիռի բեկորներն ընկել են Արքայազն Սուլթանի անվան ավիաբազայի մոտ, բայց վնաս չեն պատճառել։

Հաղորդվում է, որ չորեքշաբթի օրվանից Սաուդյան Արաբիայի հակաօդային պաշտպանությունը որսացել և ոչնչացրել է մեկ բալիստիկ հրթիռ և 15 անօդաչու թռչող սարք, որոնք ուղղված էին թագավորությանը։

Զարգացումները տեղի են ունենում տարածաշրջանային լարվածության սրման ֆոնին, որը սրվել է փետրվարի 28-ին ԱՄՆ-ի և Իսրայելի կողմից Իրանի դեմ համատեղ հարձակում սկսելուց հետո։ Իրանի իշխանությունների տվյալներով՝ հարվածների հետևանքով զոհվել է մոտ 1300 մարդ, այդ թվում՝ այն նախկին Գերագույն առաջնորդ Ալի Խամենեին։

Իրանը հակադարձում է անօդաչուներով և հրթիռներով հարվածներ հասցնելով Իսրայելին, Հորդանանին, Իրաքին և ԱՄՆ ռազմական ակտիվներ ունեցող Պարսից ծոցի երկրներին, ինչը մարդկային զոհերի և ենթակառուցվածքների վնասի պատճառ է դարձել, միաժամանակ, խաթարելով համաշխարհային շուկաներն ու ավիացիան։

ԱՄԷ-ն ամենաշատ թիրախավորված երկիրն է, որին հաջորդում են Քուվեյթը, Բահրեյնը, Կատարը, Սաուդյան Արաբիան և Հորդանանը, մինչդեռ Օմանում, որը պատերազմից առաջ միջնորդել էր Վաշինգտոնի և Թեհրանի միջև միջուկային բանակցությունները, գրանցվել է հարձակումների ամենացածր թիվը։

Թարգմանությունը՝ Էմմա Չոբանյանի