17.08.2026 | 23:08
Զորականում և Ամասիայում շչակներ են փորձարկվելու
Բեյրութին Իսրայելի հարվածների հետևանքով առնվազն 6 մարդ է զոհվել, 24-ը՝ վիրավորվել
Քաղաքականություն
18.03.2026 | 13:14
Լիբանանի Առողջապահության նախարարությունը չորեքշաբթի վաղ առավոտյան հայտնել է, որ Իսրայելի կողմից մայրաքաղաք Բեյրութի կենտրոնին և նրա հարավային արվարձաններին ավիահարվածների հետևանքով զոհվել է առնվազն 6, վիրավորվել՝ 24 մարդ, գրում է DW-ն։
Բաստա շրջանում ականատեսները հայտնել են, որ մի քանի պայթյուններ են լսվել, մինչդեռ թաղամասում տեղի ունեցած հարվածը քանդել է շենքի առնվազն երկու հարկ։
Բեյրութի կենտրոնին մոտ գտնվող Բաչուրա շրջանում էլ հզոր հարվածը մի ամբողջ շենք է ոչնչացրել։ Իսրայելցի զինվորականները հարվածից առաջ սոցիալական ցանցերում նախազգուշացում էին տարածել։ Բոլոր թիրախային տարածքները մոտ են կառավարական կարևոր շենքերին, այդ թվում՝ ֆինանսների նախարարությանը և վարչապետի գրասենյակներին։
Հարձակումները տեղի են ունեցել «Հըզբոլլահ»-ի կողմից Իսրայելի հյուսիսային հատվածի ուղղությամբ գիշերը հրթիռային հարվածներից հետո։
Հաղորդվում է նաև, որ Իսրայելի բանակը ևս մեկ տարհանման հրաման է հրապարակել հարավային Լիբանանի բնակիչների համար, ովքեր գտնվում են Զահրանի գետից հարավ։ Անցյալ շաբաթ Իսրայելի զինվորականներն ընդլայնեցին հարավային Լիբանանի համար տարհանման հրամանը՝ կոչ անելով քաղաքացիական անձանց անմիջապես տեղափոխվել գետից հյուսիս՝ սահմանից մոտ 40 կմ հեռավորության վրա։
Թարգմանությունը՝ Էմմա Չոբանյանի
