Կրասնոդարում ուկրաինական ԱԹՍ-ների գրոհի հետևանքով մեկ մարդ է զոհվել

ՌԴ Կրասնոդարի երկրամասի նահանգապետ Վենիամին Կոնդրատևը հայտնել է, որ Կրասնոդարում ուկրաինական անօդաչու թռչող սարքի հարձակման հետևանքով մեկ մարդ է զոհվել, գրում է Meduza-ն։

Ըստ նրա՝ մարտի լույս 18-ի գիշերն անօդաչուները հարվածել են քաղաքի բնակելի շենքերին՝ վնասելով երեք շենք։ Դրանցից մեկի բնակարանում  հրդեհ է բռնկվել։

Կրասնոդարի քաղաքապետ Եվգենի Նաումովն էլ հայտնել է, որ անօդաչու թռչող սարքը վնասել է Պրիկուբանսկի ներքաղաքային շրջանի բազմահարկ բնակելի շենքի բնակարաններից մեկը։ Անօդաչուի անկման հետևանքով բնակարանում հրդեհ է բռնկվել, բնակիչը զոհվել է։ Անօդաչու թռչող սարքի բեկորները վնասել են նաև բժշկական կենտրոնի տանիքը և Յուբիլեյնի միկրոշրջանի էլեկտրահաղորդման գիծը։ Մասամբ անջատվել է էլեկտրաէներգիան։

«Քաղաքի բոլոր սոցիալական հաստատությունները գործում են ըստ ժամանակացույցի և պատրաստ են ընդունել երեխաներին: Հնարավոր անօդաչու թռչող սարքերի հարձակման դեպքում գործելու ընթացակարգերի մասին անձնակազմն ու ղեկավարները տեղեկացվել են: Այնուամենայնիվ, հաշվի առնելով ներկայիս լարված իրավիճակը՝ խորհուրդ ենք տալիս երեխաներին չուղարկել դասերի: Հաստատությունների ղեկավարներն ըմբռնումով կմոտենան»,- հայտարարել է Նաումովը։

Ռուսաստանի Պաշտպանության նախարարությունը հայտնել է, որ ՀՕՊ ուժերը գիշերը որսացել և ոչնչացրել են ուկրաինական 85 անօդաչու թռչող սարք, որոնցից 42-ը՝ Կրասնոդարի երկրամասում:

Թարգմանությունը՝ Էմմա Չոբանյանի