Քաղաքականություն
17.03.2026 | 19:12
Եվրամիությունն Ուկրաինային առաջարկել է տեխնիկական աջակցություն և ֆինանսավորում՝ «Դրուժբա» նավթամուղի վերանորոգման համար, որը վնասվել էր հունվարի 27-ին Ռուսաստանի կողմից իրականացված հարվածի հետևանքով։ Կիևն ընդունել է առաջարկը։ Այս մասին ասվում է Եվրահանձնաժողովի նախագահ Ուրսուլա ֆոն դեր Լեյենի և Եվրոպական Խորհրդի նախագահ Անտոնիո Կոշտայի համատեղ հայտարարության մեջ, գրում է The Insider-ը։
Դրանում նշվում է, որ ԵՄ-ն «ինտենսիվ բանակցություններ» է վարել Ուկրաինայի և անդամ պետությունների հետ՝ Հունգարիա և Սլովակիա նավթի մատակարարումները վերականգնելու համար, որոնք ընդհատվել էին ենթակառուցվածքների վրա հարձակումից հետո։
«ԵՄ-ն տեխնիկական աջակցություն և ֆինանսավորում է առաջարկել Ուկրաինային։ Ուկրաինացիները ողջունել և ընդունել են այս առաջարկը։ Եվրոպացի փորձագետները պատրաստ են անմիջապես սկսել աշխատանքը»,- ասվում է հայտարարության մեջ։
Միաժամանակ, Բրյուսելն ընդգծում է, որ զուգահեռ շարունակվում են աշխատանքներն այլընտրանքային մատակարարման ուղիների, մասնավորապես, ոչ ռուսական նավթի տարանցման ուղղությամբ դեպի Կենտրոնական և Արևելյան Եվրոպայի երկրներ։ Հետևաբար, խողովակաշարի վերականգնումը դիտվում է որպես էներգետիկ անվտանգության ապահովման միջոց, այլ ոչ թե ռուսական հում նավթի տարանցումը վերսկսելու քաղաքական որոշում։
«Դրուժբա» նավթամուղի շուրջ կոնֆլիկտը սրվել էր հունվարի վերջին նավթի մղման դադարեցումից հետո։ Հունգարիան և Սլովակիան պահանջել էին դրա վերսկսումը՝ հղում անելով գործող համաձայնագրերին և ԵՄ-ի կողմից մինչև 2027 թվականը ռուսական էներգետիկ ռեսուրսներ ներմուծելու թույլտվությանը։
Սլովակիայի վարչապետ Ռոբերտ Ֆիցոն հայտարարել էր, որ Ուկրաինան հետաքրքրված չէ տարանցումը վերսկսելով, մինչդեռ Կիևը, իր հերթին, մատնանշել էր վնասված ենթակառուցվածքների երկարատև վերանորոգման անհրաժեշտությունը։
Թարգմանությունը՝ Էմմա Չոբանյանի
