07.09.2026 | 11:21
Ունենք ոչ թե ավտոբուսների քանակի, այլ փողոցների ծանրաբեռնվածության խնդիր․ Ավինյան․ ՏԵՍԱՆՅՈւԹ
Իրանի նոր գերագույն առաջնորդը մերժում է ԱՄՆ-ի հետ լարվածության նվազեցման, հրադադարի առաջարկները. Reuters
Քաղաքականություն
17.03.2026 | 16:16
Իրանի նոր գերագույն առաջնորդ Մոջթաբա Խամենեին մերժել է լարվածության նվազեցման կամ Միացյալ Նահանգների հետ հրադադարի մասին առաջարկները, որոնք Թեհրանին փոխանցվել էին երկու միջնորդ երկրների կողմից։ Այս մասին հայտարարել է իրանցի բարձրաստիճան պաշտոնյան, գրում է Reuters-ը։
Պաշտոնյան ասել է, որ Խամենեիի դիրքորոշումն ԱՄՆ-ի և Իսրայելի դեմ վրեժխնդրության հարցում «շատ կոշտ և լուրջ» էր արտաքին քաղաքականությանը նվիրված իր առաջին նիստում։ Նա, սակայն, չի մանրամասնել՝ արդյո՞ք գերագույն առաջնորդն անձամբ է մասնակցել նիստին։
Իրանի դեմ ԱՄՆ-ի և Իսրայելի պատերազմն ընթանում է արդեն երրորդ շաբաթը։ Այս ընթացքում զոհվել է առնվազն 2000 մարդ։
Բացի այդ, Հորմուզի նեղուցը մեծ մասամբ փակ է մնում այն բանից հետո, երբ ԱՄՆ դաշնակիցները մերժել են նախագահ Դոնալդ Թրամփի՝ կարևորագույն ջրային ճանապարհը բացելու հարցում օգնության խնդրանքը, ինչը հանգեցրել է էներգակիրների գների բարձրացման և գնաճի հետ կապված մտահոգությունների։
Անանուն մնալու պայմանով բարձրաստիճան պաշտոնյան ասել է, որ Իրանի գերագույն առաջնորդն ասել է՝ «հիմա խաղաղության ժամանակը չէ, քանի դեռ Միացյալ Նահանգներն ու Իսրայելը ծնկի չեն իջել, չեն ընդունել պարտությունը և չեն վճարել փոխհատուցում»։
Մարտի 14-ին երեք աղբյուրներ Reuters-ին հայտնել էին, որ Թրամփի վարչակազմը մերժել է մերձավորարևելյան դաշնակիցների ջանքերը՝ Իրանի պատերազմը դադարեցնելու նպատակով դիվանագիտական բանակցություններ սկսելու վերաբերյալ։
Թարգմանությունը՝ Էմմա Չոբանյանի
