17.08.2026 | 23:08
Զորականում և Ամասիայում շչակներ են փորձարկվելու
Իրանի նոր առաջնորդը ողջ է մնացել ԱՄՆ-Իսրայել ավիահարվածից հետո, քանի որ դրանից առաջ դուրս էր եկել տանից. The Telegraph
Քաղաքականություն
17.03.2026 | 14:45
Իրանի նոր գերագույն առաջնորդ Մոջթաբա Խամենեին ողջ է մնացել փետրվարի 28-ին ԱՄՆ-Իսրայելի ավիահարվածից հետո՝ հարձակումից կարճ ժամանակ առաջ տանից դուրս գալու շնորհիվ։ Այս մասին գրում է The Telegraph-ը, որի տրամադրության տակ է հայտնվել Իրանի նախկին առաջնորդ Ալի Խամենեիի գրասենյակի արարողակարգի ղեկավար Մազահեր Հոսեյնիի՝ Իսլամական հեղափոխության պահապանների կորպուսի (ԻՀՊԿ) բարձրաստիճան հոգևորականներին և հրամանատարներին ուղղված ելույթի աուդիոձայնագրությունը, փոխանցում է Meduza-ն։
Մոջթաբա Խամենեին, կնոջ և որդու հետ միասին, գտնվել է Թեհրանի նույն համալիրում, որտեղ նրա հայրը՝ այաթոլլահ Ալի Խամենեին։ Փետրվարի 28-ին համալիրին հարված է հասցվել։
«Աստծո կամոք՝ Մոջթաբան ստիպված էր դուրս գալ բակ՝ ինչ-որ բան անելու, ապա վերադառնալու։ Նա դրսում էր և վերև էր բարձրանում, երբ նրանք հրթիռ արձակեցին շենքի վրա»,- ասվում է ձայնագրության մեջ։
Մազահեր Հոսեյնիի խոսքով՝ Մոջթաբան ստացել է «ոտքի թեթև վնասվածք»։ Նա պնդում է, որ հարվածները միաժամանակ թիրախավորել են համալիրի մի քանի հատվածներ և նպատակ են ունեցել ոչնչացնել Խամենեիի ամբողջ ընտանիքը։ Հարվածի հետևանքով զոհվել էին Ալի Խամենեին, Մոջթաբայի կինը և որդին։
Իրանցի պաշտոնյան The Telegraph-ին ասել է, որ ռազմական հրամանատարները որևէ տեղեկություն չունեն նոր գերագույն առաջնորդի վիճակի մասին։
Իրանը մարտի 8-ին հայտարարեց Մոջթաբա Խամենեիի՝ նոր գերագույն առաջնորդ ընտրվելու մասին: Իրանի վրա ԱՄՆ-ի և Իսրայելի օդային հարվածների սկսվելուց ի վեր Մոջթաբա Խամենեին հանրությանը չի ներկայացել: Երկրի արտաքին գործերի նախարարությունը հայտարարել է, որ նա վիրավորվել է, բայց լավ է զգում։
Իրանական պետական լրատվամիջոցները մարտի 2-ին հայտնել էին, որ փետրվարի 28-ի հարվածի ժամանակ զոհվել է նաև Ալի Խամենեիի կինը՝ Մանսուրե Խոջաստեն: Սակայն ավելի ուշ Fars լրատվական գործակալությունը հայտարարել էր, որ նա ողջ է մնացել։
Քուվեյթի «Ալ-Ջարիդա» պարբերականը մարտի 15-ին հայտնել էր, որ Մոջթաբա Խամենեին բուժում է ստանում Մոսկվայում: Ռուսաստանի նախագահի մամուլի խոսնակ Դմիտրի Պեսկովը, սակայն, հրաժարվել է մեկնաբանել այս տեղեկությունը։
Թարգմանությունը՝ Էմմա Չոբանյանի
