27.10.2026 | 00:08
Վարդան Մինասյանն աշխատանքի է անցել Լիբանանում
Աֆղանստանը հայտնել է Պակիստանի հարվածի հետևանքով 400 զոհի մասին
Քաղաքականություն
17.03.2026 | 11:42
Պակիստանը և Աֆղանստանը մարտի 16-ին Քաբուլին և Նանգարհար նահանգին Պակիստանի կողմից ավիահարվածների վերաբերյալ արմատապես տարբեր վարկածներ են ներկայացնում: Աֆղանստանում ներկայում իշխող «Թալիբան» շարժումը պնդում է, որ Քաբուլի վրա հարվածները ոչնչացրել են թմրամիջոցներից կախվածություն ունեցողների համար նախատեսվսած վերականգնողական կլինիկան՝ սպանելով 400 և վիրավորելով 250 մարդու, գրում է DW-ի ռուսական ծառայությունը։
Պակիստանը հերքում է քաղաքացիական թիրախի վրա հարձակմանն իր մասնակցությունը: Երկրի տեղեկատվության և հեռարձակման նախարար Աթաուլլահ Թարարը X-ում գրել է, որ գործողության թիրախը եղել են թալիբների ռազմական օբյեկտները: Նա նշել է, որ Քաբուլում երկու վայրերում ոչնչացվել են զինամթերքի պահեստներ և տեխնիկական աջակցության ենթակառուցվածքներ:
«Հարվածներից հետո տեսանելի երկրորդային պայթյունները հստակորեն վկայում են խոշոր զինամթերքի պահեստների առկայության մասին»,- նշել է պակիստանցի պաշտոնյան։
Աֆղանստանի արևելքում գտնվող Նանգարհար նահանգում պակիստանյան ուժերը, ըստ տեղեկությունների, հարձակվել են թալիբների չորս ռազմական օբյեկտների վրա՝ ոչնչացնելով դրանց հետ կապված տեխնիկական և լոգիստիկ ենթակառուցվածքները, ինչպես նաև զինամթերքը:
«Թալիբանի քարոզիչների կեղծ պնդումները չեն խաբի աֆղանցիներին և աշխարհին, նաև չեն թաքցնի տարածաշրջանում ահաբեկչությանն աջակցելու և ֆինանսավորելու նրանց նողկալի գործողությունները»,- հայտարարել է Թարարը։
Միաժամանակ, Աֆղանստանի հարցերով ՄԱԿ-ի հատուկ զեկուցող Ռիչարդ Բենեթը X սոցիալական ցանցում գրել է, որ «ցնցված է Աֆղանստանում Պակիստանի կողմից իրականացված օդային հարվածների և դրանց հետևանքով քաղաքացիական բնակչության շրջանում զոհերի մասին վերջին հաղորդագրություններից»։
Երբեմնի դաշնակից երկրների միջև լարվածությունը սրվել է այն բանից հետո, երբ Պակիստանը պահանջեց, որ Աֆղանստանը միջոցներ ձեռնարկի «Թեհրիկ-է-Թալիբան Պակիստան» (TTP) պակիստանյան զինյալ իսլամիստական խմբավորման դեմ, որը սերտորեն կապված է աֆղանական թալիբների հետ։
2025 թվականի հոկտեմբերի 9-ին Քաբուլում երկու պայթյուն էր տեղի ունեցել, որի համար «Թալիբանը» մեղադրել է Իսլամաբադին։ Աֆղանական ուժերը կրակ էին բացել սահմանային անցակետերում գտնվող պակիստանյան զորքերի վրա։ Ի պատասխան՝ Պակիստանի բանակը ծանր հրետանային հարվածներ էր հասցրել, անօդաչու թռչող սարքեր և կործանիչներ բարձրացրել օդ։ Բախումները շարունակվել էին մինչև 2025 թվականի հոկտեմբերի վերջը, երբ երկու կողմերը համաձայնել էին հրադադարի՝ Կատարի և Թուրքիայի միջնորդությամբ։ Սակայն հետագա բանակցությունները չհանգեցրին խաղաղության համաձայնագրի։
Թարգմանությունը՝ Էմմա Չոբանյանի
