29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
«10 տարի առաջ եմ դիմումը գրել»․ արքեպիսկոպոսը պնդում է՝ Գարեգին Բ-ն միայն հիմա է որոշել արձագանքել իր գրությանը
16.03.2026 | 19:53
«Վերջին 10 տարին անընդհատ, և՛ գրավոր, և՛ բանավոր ասել եմ հանգստի կոչվելու ցանկության մասին»,- Factor.am-ի հետ զրույցում ասաց Վայոց ձորի թեմի առաջնորդի պաշտոնից այսօր հեռացած Աբրահամ արքեպիսկոպոս Մկրտչյանը՝ Մայր Աթոռի տարածած հայտարարությանն ի պատասխան։
Հիշեցնենք՝ Մայր Աթոռը շուրջ երկու ժամ առաջ տեղեկացրեց, որ Վայոց ձորի թեմի առաջնորդը սեփական դիմումի համաձայն ազատվել է զբաղեցրած պաշտոնից։
Իսկ ինչու է տասը տարի առաջ Գարեգին Բ կաթողիկոսին ուղղված դիմումը միայն հիմա բավարարվում։ Մայր Աթոռի տեղեկատվական կենտրոնի տնօրեն Տեր
Եսայի քահանա Արթենյանը հստակ պատասխան չտվեց՝ նշելով, որ լրացուցիչ ճշտումների անհրաժեշտություն կա։
Իսկ ահա այսօր հանգստի կոչված Աբրահամ արքեպիսկոպոս Մկրտչյանը Factor.am-ի հարցին՝ իր կարծիքով ինչու է տասը տարի անց անդրադարձ կատարվում իր դիմումին, հստակ պատասխան չտվեց։
«Հիմա փորձում եք հարցազրույց անել, արեք այսքանով բավարարվենք»,-ասաց նա։
Նշենք, որ Աբրահամ արքեպիսկոպոս Մկրտչյանը նաև հայտարարությամբ է անդրադարձել իր պաշտոնավարման ավարտին։ Նա վերահստատել է հավատարմությունը Նիկոլ Փաշինյանի հռչակած օրակարգին։
«Այս հայտարարության նպատակն է կանխել բոլոր անհարկի, սխալ մեկնաբանությունները, շահարկումները, խեղաթյուրումները: Վերջին տարիներին, Հայ Եկեղեցու հետ կապված 2025 թ. դեպքերից շատ ավելի առաջ, ես մի քանի անգամ գրավոր և բանավոր, նաև Մայր Աթոռում ժողովների ժամանակ, դիմել և բարձրաձայնել եմ, որ ցանկանում եմ հանգստյան կոչվել:
Ինձ հանգստյան կոչելու տնօրինումը Մայր Աթոռից ստացա 16 մարտի, 2026թ. – ին (գրություն 26/023): Քանի որ սա իմ գրավոր ու բանավոր դիմումների հիման վրա կայացված որոշում է, ուստի չընդունելու որևէ պատճառ չունեմ: ․․․․ Կարծում եմ բոլորի համար պարզ է, որ Հայ Եկեղեցին կառուցվածքային, կառավարման և կանոնադրական բարեփոխումների կարիք ունի, որպեսզի այլևս այսպիսի ցնցումների ու ճգնաժամի մեջ չհայտնվի: Ուստի, ի պահանջել հարկին, պատրաստ եմ հետայսու ևս առավելագույնս օգտակար լինել ՀՀ վարչապետի նախաձեռնած Հայ Եկեղեցու բարենորոգմանը, հատկապես Եկեղեցու նոր կանոնադրությունը պատրաստելուն»,-ասված է հայտարարության մեջ։
Ի դեպ, այս հայտարարությունը թվագրված է 17.03.2026: Բարձրաստիճան հոգևորականը վաղվա ամսաթվով հրապարակված հայտարարության հետ կապված նշեց, որ հավանաբար տպագրական սխալ է։
Նարեկ Կիրակոսյան
