20.05.2026 | 15:10
«Արարատցեմենտ» գործարանը կպետականացվի // «Ուժեղ Հայաստանը» հայցեր կներկայացնի ՔՊ-ականների դեմ․ ԼՈՒՐԵՐ
Պեկինը կոչ է արել անհապաղ դադարեցնել ռազմական գործողությունները՝ Չինաստան այցը հետաձգելու մասին Թրամփի հայտարարության ֆոնին
Քաղաքականություն
16.03.2026 | 22:37
Չինաստանն արձագանքել է ԱՄՆ նախագահ Դոնալդ Թրամփի՝ բրիտանական Financial Times-ին տված հարցազրույցին, որում նա սպառնացել էր հետաձգել Չինաստանի առաջնորդ Սի Ցզինպինի հետ գագաթնաժողովը, եթե Պեկինն օգնություն չուղարկի Հորմուզի նեղուցի անվտանգության ապահովման համար, գրում է BBC-ն։
ԱՄՆ նախագահի մեկնաբանությունների վերաբերյալ հարցին Չինաստանի ԱԳՆ խոսնակ Լին Ցզյանը պատասխանել է, որ «պետության ղեկավարների դիվանագիտությունն անփոխարինելի ռազմավարական ուղղորդող դեր է խաղում Չինաստան-ԱՄՆ հարաբերություններում», միաժամանակ, հավելել, որ «կողմերը պահպանում են կապը նախագահ Թրամփի այցի վերաբերյալ»։
Թրամփի կողմից նեղուց ռազմանավեր ուղարկելու կոչի վերաբերյալ հարցին ի պատասխան՝ Լին Ցզյանը նշել է, որ վերջին լարվածությունը խաթարել է առևտրային ուղիները և տարածաշրջանային ու համաշխարհային խաղաղությունը։
«Չինաստանը վերահաստատում է բոլոր կողմերին ուղղված իր կոչը՝ անհապաղ դադարեցնել ռազմական գործողությունները։ Մենք հանձնառու ենք լարվածության թուլացմանը նպաստելուն»,- ասել է խոսնակը։
ԱՄՆ նախագահ Դոնալդ Թրամփը հայտարարել էր, որ կարծում է, թե Չինաստանը, որպես Հորմուզի նեղուցով նավթ ներմուծող, Ճապոնիայի, Հարավային Կորեայի, Ֆրանսիայի և Մեծ Բրիտանիայի հետ պետք է միանա նեղուցով նավթի տարանցումն ապաշրջափակելու «համատեղ ջանքերին»։
Թրամփը չի բացառել, որ կարող է հետաձգել Պեկինում Չինաստանի նախագահ Սի Ցզինպինի հետ մարտի վերջին նախատեսված հանդիպումը, եթե գործարքը մերժվի։
Թարգմանությունը՝ Էմմա Չոբանյանի
