Սթարմերը մերժել է Թրամփին՝ բրիտանական ռազմանավեր ուղարկել Հորմուզի նեղուց. Ֆրանսիան, Գերմանիան և Հարավային Կորեան նույնպես պատրաստ չեն

Մեծ Բրիտանիայի վարչապետ Քիր Սթարմերը հրաժարվում է ռազմանավեր ուղարկել Հորմուզի նեղուց՝ ԱՄՆ նախագահ Դոնալդ Թրամփի խնդրանքով, հաղորդում է The Telegraph-ը։ Մեծ Բրիտանիայի էներգետիկայի նախարար Էդ Միլիբանդը հայտարարել է, որ կառավարությունն «ինտենսիվորեն ուսումնասիրում է», թե ինչ կարելի է անել նեղուցը բացելու համար, բայց հրաժարվել է հստակ պարտավորություններ ստանձնել։ Դիտարկվող հնարավորություններից մեկը ծովային ականների որոնման համար անօդաչու թռչող սարքեր ուղարկելն է։ Սակայն կառավարությունը ներկայում պատրաստ չէ ռազմանավեր ուղարկել նեղուց, գրում է Meduza-ն։

Ըստ The Telegraph-ի՝ այլ երկրներ, մասնավորապես, Ֆրանսիան, Գերմանիան և Հարավային Կորեան նույնպես պատրաստ չեն ռազմանավեր ուղարկել նեղուց։ Այս երկրների շրջանում աճում է մտահոգությունը, որ պատերազմը կարող է անորոշ ժամանակով ձգվել։

Reuters-ի հաղորդմամբ՝ Ճապոնիան և Ավստրալիան նույնպես հայտարարել են, որ չունեն Մերձավոր Արևելք ռազմածովային նավեր ուղարկելու ծրագրեր՝ Հորմուզի նեղուցով նավերին ուղեկցելու համար։

Միևնույն ժամանակ, The Wall Street Journal-ը, հղում անելով ԱՄՆ պաշտոնյաներին, գրում է, որ Թրամփի վարչակազմը նախատեսում է այս շաբաթ հայտարարել, որ մի քանի երկրներ համաձայնել են կոալիցիա ստեղծել՝ Հորմուզի նեղուցով նավերը ուղեկցելու համար: Այս երկրների անուններն անհայտ են։

Թրամփը քննադատել էր Սթարմերին այն բանի համար, որ նա հրաժարվել էր հակամարտության առաջին օրը Մերձավոր Արևելքում գտնվող բրիտանական ռազմաբազաները հասանելի դարձնել Իրանին հարվածելու համար, ավելի ուշ ասելով, որ Սթարմերը «ոչինչ չի արել» պատերազմում ԱՄՆ-ին օգնելու համար, և որ նա «երբեք չէր մտածի, որ նման բան կտեսնի Մեծ Բրիտանիայից»։ Մարտի 15-ին Սթարմերը և Թրամփը հեռախոսազրույց են ունեցել։ Այս զրույցի ընթացքում նրանք քննարկել են «Հորմուզի նեղուցի բացման կարևորությունը», գրում է The Telegraph-ը։

Մարտի 14-15-ին Թրամփը հույս է հայտնել, որ Չինաստանը, Ֆրանսիան, Ճապոնիան, Հարավային Կորեան, Միացյալ Թագավորությունը և այլ երկրներ ռազմանավեր կուղարկեն Հորմուզի նեղուց՝ նավերի անվտանգ անցումն ապահովելու համար։ Թրամփը հայտարարում էր, թե Իրանի կողմից Հորմուզի նեղուցը փակելու փորձից տուժած շատ երկրներ իրենց ռազմանավերը կուղարկեն Միացյալ Նահանգների հետ միասին, սակայն չի նշել՝ արդյո՞ք կոնկրետ համաձայնագիր կնքվել է կամ ում հետ։

Թարգմանությունը՝ Էմմա Չոբանյանի