24.04.2026 | 23:32
Կապանում ջրանջատում կլինի
Իտալիան գրեթե 40 տարվա արգելքից հետո սկսել է նախապատրաստվել ատոմային էներգետիկայի վերադարձին. Bloomberg
Քաղաքականություն
15.03.2026 | 12:39
Իտալիայի կառավարությունը մշակում է ծրագիր՝ վերականգնելու ատոմային էներգիայի արտադրությունը՝ վերջին միջուկային ռեակտորի փակվելուց գրեթե չորս տասնամյակ անց։ Նախաձեռնությունը քննարկվում է էներգակիրների բարձր գները նվազեցնելու և երկրի տնտեսությունը աջակցելու ռազմավարության շրջանակում։ Այդ մասին հայտնում է Bloomberg-ը՝ հղում անելով քննարկումներին ծանոթ աղբյուրներին։
Նրանց տվյալներով՝ կառավարության ներկայացուցիչները խորհրդակցություններ են անցկացնում փորձագետների հետ և ուսումնասիրում հնարավոր տեխնոլոգիական լուծումները։ Իտալացի պաշտոնյաները արդեն այցելել են Կանադա՝ ծանոթանալու միջուկային տեխնոլոգիաներին, ինչպես նաև բանակցություններ են վարել Ֆրանսիայի ներկայացուցիչների հետ՝ նրանց ատոմային ոլորտի վիճակի և հնարավորությունների մասին։ Կառավարության ներսում քննարկվում են նաև համագործակցության տարբերակներ ԱՄՆ-ի և Հարավային Կորեայի հետ։
Իտալիայի էներգետիկայի նախարար Գիլբերտո Պիչետտո Ֆրատին հայտարարել է, որ երկիրը պետք է «որքան հնարավոր է շուտ» վերականգնի իր միջուկային ծրագիրը՝ ընդգծելով, որ նոր կայանները պետք է լինեն անվտանգ և տնտեսապես հիմնավորված։
Ատոմային էներգետիկայի վերադարձը քննարկվում է էլեկտրաէներգիայի բարձր գների պայմաններում, որոնք Եվրոպայում ամենաբարձրերից են։ Իտալիան նաև մեծապես կախված է բնական գազի ներմուծումից, ինչը երկրի տնտեսությունն ավելի խոցելի է դարձնում համաշխարհային գների տատանումների նկատմամբ։
