ԱՄՆ-ն ոչնչացրել է Իրանի Խարգ կղզում գտնվող բոլոր ռազմական թիրախները․ Թրամփ․ ՏԵՍԱՆՅՈՒԹ

ԱՄՆ կենտրոնական հրամանատարությունը իրականացրել է «Մերձավոր Արևելքի պատմության մեջ ամենահզոր ռմբակոծություններից մեկը» և «լիովին ոչնչացրել է բոլոր ռազմական թիրախները» Իրանի Խարգ կղզում, որտեղ գտնվում է երկրի ամենամեծ նավթային տերմինալը։ ԱՄՆ նախագահ Դոնալդ Թրամփն այս մասին հայտարարել է իր Truth Social էջում արված գրառմամբ։

«Իմ հրահանգով, Միացյալ Նահանգների կենտրոնական հրամանատարությունը իրականացրեց Մերձավոր Արևելքի պատմության ամենահզոր ռմբակոծություններից մեկը և ամբողջությամբ ոչնչացրեց Իրանի «թագի զարդը»՝ Խարգ կղզում գտնվող բոլոր ռազմական թիրախները: Մեր զենքերը ամենահզորն ու բարդն են, որ աշխարհը երբևէ տեսել է, բայց, պարկեշտության նկատառումներից ելնելով, ես որոշել եմ չոչնչացնել կղզու նավթային ենթակառուցվածքները: Այնուամենայնիվ, եթե Իրանը կամ որևէ մեկը ինչ որ բան անի՝ խանգարելու նավերի ազատ և անվտանգ անցմանը Հորմուզի նեղուցով, ես անմիջապես կվերանայեմ այս որոշումը:

․․․Իմ առաջին ժամկետի ընթացքում և ներկայումս ես մեր բանակը վերակառուցեցի՝ դարձնելով այն ամենամահացու, հզոր և արդյունավետ ուժ, անկասկած, աշխարհի ցանկացած վայրում: Իրանը ՈՉ ՄԻ կարողություն չունի պաշտպանելու այն ամենը, ինչի վրա մենք ցանկանում ենք հարձակվել. նրանք ոչինչ չեն կարող անել դրա դեմ: Իրանը ԵՐԲԵՔ չի ունենա միջուկային զենք, ոչ էլ կունենա սպառնալու կարողություն Ամերիկայի Միացյալ Նահանգներին, Մերձավոր Արևելքին կամ, առհասարակ, աշխարհին»,- գրել է Թրամփը ու քիչ անց նաև տեսանյութ հրապարակել։

Պարսից ծոցում գտնվող Խարգ փոքրիկ կղզին, որի երկարությունը մոտավորապես 8 կմ է, իսկ լայնությունը՝ 4-5 կմ, կարևոր նշանակություն ունի Իրանի նավթի արտահանման 90%-ի փոխադրման համար։ Այնտեղ տարեկան մշակվում է մոտ 950 միլիոն բարել նավթ։ Կղզու բնակչությունը մոտավորապես 10,000 է։

Մարտ ամսին բրիտանական The Telegraph թերթը գրել էր, որ Խարգ կղզու գրավումը թույլ կտա ԱՄՆ-ին վերահսկել Իրանի ղեկավարությունը՝ առանց զորքեր տեղակայելու մայրցամաք։

Հիշեցնենք, որ ընդամենը երկու օր առաջ Իրանի խորհրդարանի խոսնակը հայտարարել էր, որ Իրանի կղզիներ ցանկացած ներխուժման դեպքում «Պարսից ծոցը կողողվի զավթիչների արյունով»։

Թարգմանությունը՝ Անահիտ Խաչատրյանի