Թուրքական նավն անցել է Հորմուզի նեղուցով՝ Իրանի թույլտվությունից հետո

Թուրքական նավն անցել է Հորմուզի նեղուցով՝ այն բանից հետո, երբ Թուրքիան ստացել է Իրանի իշխանությունների թույլտվությունը։ Այս մասին թուրքական լրատվամիջոցներին հայտնել է երկրի տրանսպորտի և ենթակառուցվածքների նախարար Աբդուլքադիր Ուրալօղլուն, գրում է Turkish Minute-ը։

Ըստ նրա՝ նեղուցի մոտ գտնվող 15 թուրքական նավերից մեկին թույլատրվել է անցնել, քանի որ այն օգտագործել է իրանական նավահանգիստը։

«Մենք այնտեղ ունեինք 15 նավ։ Իրանի իշխանություններից թույլտվություն ստացանք մեկի համար, քանի որ այն օգտագործել է իրանական նավահանգիստ, և մենք այն անցանք»,- ասել է պաշտոնյան՝ հավելելով, որ մնացած 14 նավերը սպասում են, և որ դրանք առայժմ որևէ խնդիր չունեն։

Reuters-ը, հղում անելով թուրքական նախարարությանը, նույնականացրել է անցած նավը որպես Rozana՝ նշելով, որ տարածքում գտնվող թուրքական սեփականության նավերի վրա, ընդհանուր առմամբ, 171 հոգանոց անձնակազմ կա։

Հաղորդագրության մեջ նաև ասվում է, որ Անկարան նեղուցի համար ամենաբարձր մակարդակի անվտանգության նախազգուշացում է տվել՝ միաժամանակ շարունակելով կապերը իրանցի պաշտոնյաների հետ մյուս նավերի անցման վերաբերյալ։

Հորմուզի նեղուցը դարձել է նոր թեժ կետ՝ փետրվարի 28-ին Իրանի դեմ ԱՄՆ-Իսրայել պատերազմի սկսվելուց ի վեր։ Հակամարտությունը փաստացի փակել է նեղուցը բնականոն երթևեկության համար՝ առևտրային նավերը թողնելով արգելափակված և մտահոգություններ առաջացնելով համաշխարհային էներգամատակարարումների վերաբերյալ։

Թարգմանությունը՝ Էմմա Չոբանյանի