Թեհրանում Ալ-Ղոդսի օրվան նվիրված հանրահավաքի վայրի մոտ հզոր պայթյուն է տեղի ունեցել․ Ալի Լարիջանին նույնպես մասնակցել է երթին

Իրանի պետական ​​հեռուստատեսությունը հայտնել է, որ հզոր պայթյուն է տեղի ունեցել Թեհրանի հրապարակում, որտեղ մարդիկ հավաքվել էին Ալ-Ղոդսի օրվան նվիրված հանրահավաքի, գրում է DW-ն։

Ալ-Ղոդսի օրը Երուսաղեմի պատմական արաբական անվանումն է, օրվան նվիրված երթերը տեղի են ունենում ամեն տարի՝ իսլամական սրբազան Ռամադանի վերջին ուրբաթ օրը։ Իրանը նշում է, որ այս օրը առիթ է՝ պաղեստինցիներին աջակցություն հայտնելու և մուսուլմանների համար Երուսաղեմի կարևորությունն ընդգծելու համար։

Իրանը չի ճանաչում Իսրայելը և նշում է Ղոդսի օրը 1979 թվականի իսլամական հեղափոխության սկզբից ի վեր։

Ականատեսները պատմել են, որ մարդկանց թիվը, նախորդ տարիների համեմատ, ավելի փոքր է։

Պաշտոնական IRNA լրատվական գործակալությունը հայտնել է, որ Թեհրանում կառավարամետ հանրահավաքի մոտ տեղի ունեցած պայթյունի հետևանքով զոհվել է առնվազն մեկ մարդ։ Այլ մանրամասներ չեն հաղորդվում։

Նշվում է նաև, որ Իրանի ազգային անվտանգության ղեկավար Ալի Լարիջանին մասնակցել է Թեհրանում անցկացված զանգվածային հանրահավաքին՝ մայրաքաղաքի վրա Իսրայելի և ԱՄՆ-ի վերջին հարձակումները որակելով «հուսահատությունից դրդված»։

«Այս հարձակումները տեղի են ունենում վախից, հուսահատությունից։ Ուժեղ մարդն ընդհանրապես չի պայթեցնի ցույցերը։ Ակնհայտ է, որ դա ձախողվել է»,- ասել է Լարիջանին պետական ​​հեռուստատեսությանը։

Լարիջանիի ներկայությունն իրանցի պաշտոնյայի ամենաակնառու հրապարակային ելույթն է փետրվարի 28-ի հարվածից հետո, որի հետևանքով զոհվել են գերագույն առաջնորդ այաթոլլահ Ալի Խամենեին և այլ բարձրաստիճան պաշտոնյաներ։ Պետական ​​հեռուստատեսության կադրերը ցույց են տվել, որ միջոցառմանը ներկա է նաև Ազգային ոստիկանության պետ Ահմադ Ռեզա Ռադանը։

Թարգմանությունը՝ Էմմա Չոբանյանի