Իրաքյան Քուրդիստանում ԱԹՍ-ի հարձակման հետևանքով ֆրանսիացի զինվոր է զոհվել, մի քանիսը վիրավորվել են․ Մակրոն

Իրաքի ինքնավար Քուրդիստանի Էրբիլ քաղաքում տեղի ունեցած հարձակման հետևանքով ֆրանսիացի զինվոր է զոհվել։ Այս մասին հայտարարել է Ֆրանսիայի նախագահ Էմանուել Մակրոնը, գրում է Le Monde ը։

«Զինված ուժերի անդամը մահացել է Ֆրանսիայի համար՝ Իրաքի Էրբիլ շրջանում հարձակման ժամանակ»,- գրել է Մակրոնը X-ում՝ հաստատելով Մերձավոր Արևելքի պատերազմում առաջին ֆրանսիացի զինվորականի մահը։

Նա հավելել է, որ միջադեպի հետևանքով վիրավորվել են ևս մի քանի զինվորներ։ Ֆրանսիական զինվորականներն ավելի վաղ հայտարարել էին, որ դա անօդաչու թռչող սարքի հարձակում է եղել զորավարժություններ անցկացնող զորքերի վրա։ Վիրավորները տեղափոխվել են մոտակա բժշկական հաստատություն։

Էրբիլի նահանգապետը հայտնել է, որ հարվածն իրականացվել է երկու անօդաչու թռչող սարքով՝ Մալա Քարայի բազայում, որը գտնվում է տարածաշրջանային մայրաքաղաքից շուրջ 40 կիլոմետր հեռավորության վրա:

Մերձավոր Արևելքում պատերազմի սկսվելուց ի վեր, տարածաշրջանը թիրախավորվել է իրանամետ խմբավորումների կողմից։ Ֆրանսիացի զինվորներին վիրավորած հարձակումը հաջորդել է Էրբիլում գտնվող իտալական բազայի վրա անօդաչու թռչող սարքի առանձին հարվածին։ Այդ ժամանակ ոչ ոք չի տուժել։ ;Դրանից հետո Իտալիան հայտարարել է, որ ժամանակավորապես դուրս է բերում իր զինվորական անձնակազմը բազայից։

Մի քանի երկրներից, այդ թվում՝ Իտալիայից և Ֆրանսիայից զինվորներ մարզում են Իրաքյան Քուրդիստանի քրդական անվտանգության ուժերի անդամներին՝ Վաշինգտոնի գլխավորած միջազգային հակաջիհադիստական ​​կոալիցիայի շրջանակում։

Փետրվարի 28-ին Իրանի վրա ԱՄՆ-ի և Իսրայելի կողմից իրականացված հարվածներից հետո, որոնք հանգեցրին Թեհրանի պատասխան հարձակումներին Մերձավոր Արևելքում և դրանից դուրս, Ֆրանսիայի նախագահ Էմանուել Մակրոնը պնդել է, որ իր երկրի դիրքորոշումը «զուտ պաշտպանական» բնույթ է կրում։

Թարգմանությունը՝ Էմմա Չոբանյանի