16.05.2026 | 21:15
Նախընտրական պաստառ պոկելու գործով ձերբակալվածը Նուբարաշենի հոգեբուժարանում ինքնասպան է եղել
Իրաքի ափերի մոտ հարձակման ենթարկված լցանավում 23 վրացի նավաստի է եղել
Քաղաքականություն
12.03.2026 | 18:38
Իրաքի Բասրա նավահանգստի մոտ հարձակման ենթարկված լցանավերից մեկում 23 վրացի նավաստի է եղել։ Բոլորը փրկվել են, «Ազատություն» ռադիոկայանի վրացական ծառայությանը հայտնել է վրացի նավաստի Իրակլի Ջաշիի կինը՝ Նինո Սուրմանիձեն, գրում է Current time-ը:
Zefyros և Safesea Vishnu նավթատարները հարձակման են ենթարկվել մարտի 12-ի գիշերը: BBC Verify-ը, հղում անելով Marine Traffic-ի տվյալներին, պարզաբանում է, որ Zefyros-ը հունական սեփականության նավ է, նավարկում է Մալթայի դրոշի ներքո և ուղևորվում էր դեպի Իրաքի նավահանգիստ: Safesea Vishnu-ն ԱՄՆ-ի սեփականությունն է, նավարկում է Մարշալյան կղզիների դրոշի ներքո: Այն ուղևորվում էր դեպի Հնդկաստան:
Zefyros նավի վրա Վրաստանի 23 քաղաքացի է եղել, այդ թվում՝ լցանավի կապիտանը։
«Ես նրա հետ խոսեցի երեկ՝ մոտավորապես կեսգիշերին, և ամեն ինչ լավ էր։ Հետո նա զանգահարեց ժամը 2:30-ի սահմաններում և արագ ասաց՝ «Բոլորը ողջ են, անվտանգ են»։ Մենք կրկին խոսեցինք առավոտյան։ Նրանց լցանավին հարվածվել էր անօդաչու թռչող սարքը և ամեն ինչ այրել։ Երկրորդ լցանավի վրա զոհեր կային։ Նրանք տեղափոխվել են Իրաքի նավահանգիստ»,- ասել է Սուրմանիձեն։
Նրա խոսքով՝ ամուսինն այս նավի վրա աշխատել է վեց ամիս, և եթե Մերձավոր Արևելքում մարտական գործողությունները չլինեին, նա մարտի 10-ին պետք է վերադառնար Վրաստան։
Իրաքի իշխանությունները հայտնել են, որ երկու նավերի վրա հարձակումներից հետո փրկվել է 38 մարդ։ Ըստ լրատվամիջների՝ մեկ մարդ՝ Safesea Vishnu լցանավի անձնակազմի անդամը, մահացել է։
Հղում անելով Հնդկաստանի իշխանություններին՝ BBC Verify-ը հաղորդում է, որ Safesea Vishnu-ն հարձակման է ենթարկվել «սպիտակ, անօդաչու մոտորանավակի կողմից, որը պայթուցիկներ էր տեղափոխում», որը «բախվել է դրան՝ առաջացնելով խոշոր հրդեհ նավի վրա»:
Թարգմանությունը՝ Էմմա Չոբանյանի
