20.05.2026 | 23:00
Իսրայելը քննարկում է Ստամբուլում հյուպատոսության փակման հարցը՝ Թուրքիայի հետ լարված հարաբերությունների ֆոնին
Մեքենան հրկիզելու պատվերը նախկին ու ներկա պաշտոնյաներ են տվել․ Ստեփանյան․ ՏԵՍԱՆՅՈՒԹ
Քաղաքականություն
12.03.2026 | 15:44
Երևանի ավագանու «Մայր Հայաստան» խմբակցության անդամ Գեղամ Ստեփանյանը լրագրողների հետ զրույցում հայտարարեց, որ շուրջ մեկ տարի առաջ իր տան դիմաց մեքենայի հրկիզման դեպքով առաջիկայում նոր բացահայտումներ կլինեն։
«Հրկիզողին գտել են, բայց մի քանի օր հետո նրանց տուն են թողել։ Երկու երեխա են եղել՝ մինչև 20 տարեկան»,- ասաց Ստեփանյանը։
Նրա խոսքով՝ երիտասարդների հարազատներից ոմանք կապ են հաստատել իր հետ և որոշ տեղեկություններ փոխանցել։ Միաժամանակ, ավագանու ընդդիմադիր անդամը պնդեց, որ դեպքի հետևում կանգնած են որոշ նախկին և ներկա պաշտոնյաներ, սակայն անուններ չհրապարակեց՝ նշելով, որ դա պետք է անեն իրավապահ մարմինները։
«Մի քանի օրից արդեն առաջին դատական նիստն է լինելու, և շատ բաներ պարզ կդառնան»,- ասաց Ստեփանյանը։
Ավագանու ընդդիմադիր անդամը տեղեկացրեց, որ երիտասարդները ներկայում ազատության մեջ են և նրանց նկատմամբ որևէ խափանման միջոց կիրառված չէ։ Նա նաև հավելեց, որ անձամբ չի առերեսվել երիտասարդների հետ, սակայն ծանոթ է քրեական գործի նյութերին։
Հիշեցնենք, որ 2025-ի մայիսի 6-ին հրկիզել էին Երևանի ավագանու «Մայր Հայաստան» խմբակցության անդամ Գևորգ Ստեփանյանի մեքենան, որը կայանված է եղել տան հարևանությամբ։ Գույք ոչնչացնելու կամ վնասելու հոդվածով քրեական վարույթ էր նախաձեռնվել։ Այս հանցանքը պատժվում է երեքից վեց տարի ժամկետով ազատազրկմամբ:
Մանրամասները՝ տեսանյութում։
Արփի Հակոբյան
