27.10.2026 | 00:08
Վարդան Մինասյանն աշխատանքի է անցել Լիբանանում
Իսրայելը հայտարարել է Իրանի միջուկային զենքի մշակման օբյեկտին հարվածելու մասին
Քաղաքականություն
12.03.2026 | 15:28
Իսրայելի բանակը հայտարարել է, որ վերջերս հարվածել է իրանական միջուկային օբյեկտի, որտեղ իրանական կողմն աշխատել է «միջուկային զենքի մշակման կարևորագույն հնարավորությունների» վրա։ Թեհրանի մոտակայքում գտնվող օբյեկտը, որը իսրայելցի զինվորականների կողմից նույնականացվել է որպես Թալեղանի համալիր, հարված է ստացել վերջին մի քանի օրերի ընթացքում ռազմաօդային ուժերի կողմից տարածքում իրականացված մի շարք հարվածների ժամանակ։
Իսրայելական կողմի պնդմամբ՝ վերջին տարիներին Իրանն այդ վայրն օգտագործել է «առաջադեմ պայթուցիկ նյութերի մշակման և զգայուն փորձարկումներ անցկացնելու համար՝ որպես AMAD նախագծի մաս», որն Իրանի ենթադրյալ գաղտնի միջուկային զենքի մշակման ծրագիր է։
Թալեղանի համալիրին Իսրայելը հարվածել էր 2024 թվականի հոկտեմբերին՝ նույն ամսվա սկզբին Իսրայելի վրա Իրանի կողմից իրականացված հրթիռային հարձակմանը պատասխան գործողությունների ժամանակ։
Զինվորականները հայտնում են, որ վերջերս հայտնաբերել են, որ Իրանը «քայլեր է ձեռնարկել՝ այդ հարվածներից հետո համալիրը վերականգնելու համար»։
«Իրանական ռեժիմը շարունակել է ջանքերը՝ միջուկային զենքի մշակման համար անհրաժեշտ կարողությունները զարգացնելու ուղղությամբ»,- հայտարարել է Իսրայելի բանակը՝ հավելելով, որ վերջին հարվածը «գործողությունների շարքի» մի մասն է, որոնք ուղղված են «իրանական ահաբեկչական ռեժիմի միջուկային ձգտումներին հետագա վնաս հասցնելուն»։
Թարգմանությունը՝ Էմմա Չոբանյանի
