Իրանը կթույլատրի Հնդկաստանի դրոշի ներքո նավարկող լցանավերի անցումը Հորմուզի նեղուցով

Իրանը թույլ կտա Հնդկաստանի դրոշի ներքո նավարկող լցանավերին անցնել Հորմուզի նեղուցով, որով անցնում է Հնդկաստանի հում նավթի ներմուծման 40%-ը, հայտարարել է հնդկական աղբյուրը։ Երկրից դուրս գտնվող իրանական աղբյուրը, սակայն, հերքել է, որ նման համաձայնություն կա, գրում է Reuters-ը։

Հնդկաստանի արտաքին գործերի նախարարությունը և Նյու Դելիում Իրանի դեսպանատունն անմիջապես չեն արձագանքել մեկնաբանության խնդրանքներին։ Հնդկական աղբյուրը հրաժարվել է անունը նշել՝ հղում անելով լրատվամիջոցների հետ խոսելու թույլտվության բացակայությանը, մինչդեռ իրանական աղբյուրը մատնանշել է հարցի զգայունությունը։

Չորեքշաբթի Հնդկաստանի արևմտյան Կանդլա նավահանգիստ ուղևորվող թաիլանդական նավը հարձակման էր ենթարկվել նեղուցում, ինչը խիստ քննադատության է արժանացել Նյու Դելիի կողմից։

«Հնդկաստանն ափսոսում է այն փաստի համար, որ Արևմտյան Ասիայում շարունակվող հակամարտության ընթացքում առևտրային նավագնացությունը դառնում է ռազմական հարձակումների թիրախ։ Թանկագին կյանքեր, այդ թվում՝ Հնդկաստանի քաղաքացիների, արդեն կորսվել են հակամարտության վաղ փուլում տեղի ունեցած բազմաթիվ նմանատիպ հարձակումների հետևանքով, և հարձակումների ինտենսիվությունն ու մահվան դեպքերը, կարծես, աճում են»,- չորեքշաբթի հայտարարել է երկրի ԱԳ նախարարությունը։

Իրանը հարձակվել է առնվազն 16 նավի վրա այն բանից հետո, երբ Իսրայելը և Միացյալ Նահանգները փետրվարի վերջին պատերազմ սկսեցին երկրի դեմ։ Թեհրանը զգուշացրել է, որ նավթի գները կարող են բարձրանալ մինչև 200 դոլար մեկ բարելի համար, գրեթե կրկնակի ավելի, քան ներկայիս մակարդակն է։

Հնդկաստանի արտաքին գործերի նախարար Ջայշանկարը այս շաբաթվա սկզբին հեռախոսազրույց է ունեցել իր իրանցի գործընկեր Աբբաս Արաղչիի հետ և քննարկել նեղուցով ծովային երթևեկության անվտանգությունը՝ այլ հարցերի շարքում, հայտնում է իրանական կողմը։

Երթուղու գրեթե փակվելը ստիպել է Հնդկաստանին՝ աշխարհի երրորդ նավթ սպառողին, փնտրել այլընտրանքներ, օրինակ՝ Ռուսաստանից ավելի շատ նավթ գնել։

Թարգմանությունը՝ Էմմա Չոբանյանի