27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Լիբանանը հայտնել է Բեյրութին Իսրայելի հարվածի հետևանքով 7 զոհի մասին
Քաղաքականություն
12.03.2026 | 16:39
Իսրայելական բանակը գիշերը ծանր ավիահարվածներ է հասցրել Լիբանանին, գրում է DW-ն։ Հարձակումը տեղի է ունեցել մայրաքաղաք Բեյրութի արևելյան հատվածում գտնվող Ռամլետ ալ-Բայդա ծովափնյա շրջանում, որի հետևանքով զոհվել է առնվազն յոթ մարդ, 21 վիրավոր կա, հայտնում է Լիբանանի առողջապահության նախարարությունը։
Տեղական լրատվամիջոցները հաղորդում են, որ Իսրայելի հարվածների հետևանքով տեղահանված բազմաթիվ մարդիկ վրաններով ապաստան են գտել Ռամլետ ալ-Բայդայում։
Հինգշաբթի վաղ առավոտյան պայթյուններ են տեղի ունեցել Բեյրութի կենտրոնական մասում։ Իսրայելական ուժերը հայտնել են, որ հարվածել են Բեյրութի հարավային Դահիյե շրջանում գտնվող 10 կառույցի, որը լիբանանյան «Հըզբոլլահ» խմբավորման ավանդական հենակետն է։
Իսրայելական հարվածները հաջորդել են «Հըզբոլլահ»-ի կողմից Իսրայելի հյուսիսային մասի վրա հրթիռային հարձակումներին։
Լիբանանի առողջապահության նախարարությունը հայտնել է, որ Իսրայելի և «Հըզբոլլահի» միջև 10-օրյա մարտերի ընթացքում զոհերի թիվը հասել է ավելի քան 630-ի։ Հստակ չէ՝ արդյո՞ք այս թիվը ներառում է վերջին մահերը։ Ավելի քան 800,000 մարդ գրանցվել է որպես տեղահանված, ասվում է նախարարության հայտարարության մեջ։
Ազգային անվտանգության ուսումնասիրությունների ինստիտուտի կողմից երկուշաբթի հրապարակված տվյալների համաձայն՝ Իսրայելում 12 քաղաքացիական անձ և երկու զինվոր է զոհվել փետրվարի 28-ին ԱՄՆ-ի և Իսրայելի կողմից Իրանի դեմ պատերազմի մեկնարկից ի վեր։
Թարգմանությունը՝ Էմմա Չոբանյանի
