02.07.2026 | 23:02
Կառավարությունը հաստատել է ջերմատնային տնտեսությունների վարկերի տոկոսադրույքների սուբսիդավորման ծրագիրը
ԱՄՆ հետախուզությունն Իրանում ռեժիմի փլուզման նշաններ չի տեսնում գրեթե երկու շաբաթ տևող հարվածներից հետո. Reuters
Քաղաքականություն
12.03.2026 | 15:50
Իրանի ղեկավարության դիրքորոշումը մեծ մասամբ անփոփոխ է մնում և մոտ ապագայում փլուզման վտանգի տակ չէ։ Նման եզրակացության է հանգել ԱՄՆ հետախուզությունը, հաղորդում է Reuters-ը՝ հղում անելով աղբյուրներին, գրում է Meduza-ն։
Աղբյուրներից մեկի համաձայն՝ «բազմաթիվ» հետախուզական զեկույցներ եզրակացնում են, որ իրանական ռեժիմը «պահպանում է բնակչության նկատմամբ վերահսկողությունը»։
Իսրայելցի պաշտոնյաները փակ հանդիպումների ժամանակ նաև խոստովանել են՝ վստահ չեն, որ պատերազմը կհանգեցնի Իրանում ռեժիմի փոփոխության, Reuters-ին ասել է Իսրայելի բարձրաստիճան պաշտոնյան։
Գործակալությունը նաև նշում է, որ դեռևս պարզ չէ, թե ինչպես ԱՄՆ-Իսրայել ռազմական արշավը կկարողանա տապալել Իրանի ներկայիս կառավարությունը։ Reuters-ի աղբյուրներից մեկը ենթադրություն է հայտնել, որ դա կպահանջի ցամաքային գործողություն։
ԱՄՆ-ն և Իսրայելը սկսեցին Իրանին հարվածել փետրվարի 28-ին։ Ի պատասխան՝ Թեհրանը հարձակումներ սկսեց Իսրայելի և այն երկրների վրա, որոնց Վաշինգտոնի դաշնակիցներ է համարում։ Փետրվարի 28-ին Իսրայելի կողմից իրականացված օդային հարվածի հետևանքով սպանվեց Իրանի գերագույն հոգևոր առաջնորդ Ալի Խամենեին։ Նրա որդին՝ Մոջթաբա Խամենեին, ընտրվեց երկրի նոր գերագույն առաջնորդ։
The Wall Street Journal-ի տեղեկություններով՝ ԱՄՆ նախագահ Դոնալդ Թրամփն իր օգնականներին ասել է, որ կաջակցի Մոջթաբա Խամենեիի սպանությանը, եթե նա պատրաստ չլինի համաձայնվել իր պահանջներին։ Հրապարակավ Թրամփը հայտարարել է, որ պետք է մասնակցի Իրանի նոր առաջնորդի նշանակմանը երկրի «անվերապահ կապիտուլյացիայից» հետո։
Թարգմանությունը՝ Էմմա Չոբանյանի
