ՄԱԿ-ը բանաձև է ընդունել. պահանջում է դադարեցնել Իրանի հարձակումները հարևան երկրների վրա

ՄԱԿ-ի Անվտանգության խորհուրդը պահանջել է անհապաղ դադարեցնել Իրանի հարձակումները Պարսից ծոցի հարևան պետությունների վրա: Համապատասխան բանաձևն ընդունվել է մարտի 11-ին միջազգային իրավունքի և անվտանգության պահպանման համար պատասխանատու ՄԱԿ-ի գլխավոր մարմնի 15 անդամ երկրներից 13-ի քվեարկությամբ, գրում է DW-ի ռուսական ծառայությունը։

Բանաձևը քննարկման են ներկայացրել Պարսից ծոցի համագործակցության խորհրդի անդամները (ԱՄԷ, Սաուդյան Արաբիա, Քուվեյթ, Օման, Կատար և Բահրեյն) և Հորդանանը: Փաստաթղթում նշվում է, որ Իրանի հարձակումներն այդ պետությունների վրա խախտում են միջազգային իրավունքը և «լուրջ սպառնալիք են ներկայացնում համաշխարհային խաղաղության և անվտանգության համար»: Սակայն փաստաթղթում չեն հիշատակվում Միացյալ Նահանգները և Իսրայելը, որոնք ռազմական գործողություններ են սկսել Իրանի դեմ։

Բանաձևը նաև դատապարտում է Թեհրանի կողմից «ցանկացած գործողություն կամ սպառնալիք», որը նպատակ ունի «արգելափակել, խոչընդոտել կամ այլ կերպ խաթարել միջազգային նավարկությունը Հորմուզի նեղուցով»։ Այս նեղուցը, որը ծառայում է որպես Մերձավոր Արևելքից նավթի արտահանման կենսական տրանսպորտային զարկերակ, Թեհրանի կողմից փաստացի շրջափակման է ենթարկվել Իրանի դեմ ԱՄՆ-Իսրայել պատերազմի սկզբից ի վեր։

ՄԱԿ-ի Անվտանգության խորհրդի երկու մշտական ​​անդամներ՝ Ռուսաստանը և Չինաստանը, ձեռնպահ են  մնացել բանաձևի քվեարկությունից։

«Փաստաթուղթը միակողմանի և կողմնակալ է ու անկարող է տարածաշրջանում խաղաղություն հաստատել»,- ասել է ՄԱԿ-ում Ռուսաստանի մշտական ​​ներկայացուցիչ Վասիլի Նեբենզյան։

Նրա խոսքով՝ Ռուսաստանն առաջարկել է փաստաթղթին ավելացնել Իրանին հարվածներ հասցնելու դատապարտման մասին դրույթ։ Ռուսաստանը ՄԱԿ-ի Անվտանգության խորհրդի նիստում ներկայացրել է նաև Մերձավոր Արևելքի հակամարտության վերաբերյալ իր սեփական բանաձևը, սակայն ԱՄՆ-ը վետո է դրել։

Իր հերթին, Իրանը քննադատել է Պարսից ծոցի երկրների բանաձևի ընդունումը։ Իրանի ներկայացուցիչ Ամիր Սաիդ Իրավանին այն անվանել է «ՄԱԿ-ի Անվտանգության խորհրդի մանդատի չարաշահում՝ Միացյալ Նահանգների և Իսրայելի քաղաքական նպատակներին հասնելու համար», իսկ Իրանին անվանել է «ագրեսիայի զոհ»։

Փետրվարի 28-ի առավոտյան ԱՄՆ-ն և Իսրայելը սկսեցին զանգվածային ավիահարվածներ Իրանի դեմ՝ հայտարարելով «Էպիկական զայրույթ» գործողության մեկնարկի մասին: Հարվածների արդյունքում զոհվեցին գերագույն առաջնորդ այաթոլլա Ալի Խամենեին և Իրանի ղեկավարության այլ անդամներ: Իրանը հակադարձում է ՝ հարվածներ հասցնելով Իսրայելին և Պարսից ծոցի երկրներին: Այս հարձակումների ընթացքում գրանցվել են քաղաքացիական թիրախների վրա արկերի և անօդաչու թռչող սարքերի բազմաթիվ հարվածներ:

Իրանի նախագահ Մասուդ Փեզեշքիանը հետագայում ներողություն խնդրեց հարևան երկրներից, իսկ Իսլամական հեղափոխության պահապանների կորպուսը հայտարարեց, որ Իրանը կշարունակի հարվածել տարածաշրջանի ցանկացած երկրում գտնվող ամերիկյան ռազմական բազաներին։

Թարգմանությունը՝ Էմմա Չոբանյանի