Հրաչյա Հարությունյանի ազգականները նրան տեսակցելու թույլտվություն դեռ չեն ստացել

ՌԴ Պոդոլսկի մոտակայքում 2013 թվականի հուլիսի 13-ին տեղի ունեցած ավտովթարի գործով 6 տարի 9 ամսվա  ազատազրկման դատապարտված հայաստանցի վարորդ Հրաչյա Հարությունյանը տեղափոխվել է Հայաստան, սակայն հարազատները նրան տեսակցելու հնարավորություն դեռևս չեն ստացել: Այս մասին Factor.am-ին տեղեկացրեց Հրաչյա Հարությունյանի աները՝ Վիկտոր Մարտիրոսյանը։
Նշենք, որ ՌԴ-ից Հայաստան տեղափոխված Հրաչյա Հարությունյանը այս պահին գտնվում է «Նուբարաշեն» քրեակատարողական հիմնարկում: Նրա պատժի կրման վայրը կորոշվի առաջիկայում: 

Վիկտոր Մարտիրոսյանն ասաց՝ հույս ունեն, որ առաջիկա օրերի ընթացքում Հրաչյա Հարությունյանին տեսակցելու հնարավորություն կստանան:

«Դեռ չենք տեսել, ո՞վ է թողել, որ տեսնենք, պետք  է թույլ տան»,- մեզ հետ զրույցում ասաց նա:

Հիշեցնենք՝ 2013 թվականի հուլիսի 13-ին Պոդոլսկի շրջանում ԿԱՄԱԶ մակնիշի մեքենայով տեղի ունեցած ավտովթարի հետևանքով 18 մարդու մահվան պատճառ դարձած Հրաչյա Հարությունյանը մեղավոր է ճանաչվել ՌԴ Օրենսգրքի 264 (ճանապարհային երթևեկության և տրանսպորտային միջոցների շահագործման խախտման) և 327 (կեղծ փաստաթղթերի պատրաստում) հոդվածներով նախատեսված արարք կատարելու մեջ և դատապարտվել 6,9 տարի ազատազրկման:

Այսօր նա տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով՝ պատժի մնացած մասը՝ 2 տարի 9 ամիսը Հայաստանում կրելու համար: 

Շողիկ Գալստյան