10.03.2026 | 20:21
Ինչ իրավիճակ է ճանապարհներին
Լիբանանում մեկ օրում 100,000 մարդ է տեղահանվել. ՄԱԿ
Քաղաքականություն
10.03.2026 | 18:36
Լիբանանում մարդիկ ստիպված են լքել իրենց տները, որոնց կյանքը մեծապես խաթարվել է այն բանից հետո, երբ այս ամիս երկիրը ներքաշվել է Իրանի դեմ ԱՄՆ-ի և Իսրայելի պատերազմի մեջ, հայտնում է ՄԱԿ-ի փախստականների հարցերով գործակալությունը, գրում է DW-ն։
ՄԱԿ-ի փախստականների հարցերով գերագույն հանձնակատարի գրասենյակը հայտարարել է, որ ավելի քան 667,000 մարդ այժմ գրանցված է որպես ներքին տեղահանված, ինչն ընդամենը մեկ օրում 100,000-ով ավելի է, նշել է ՄԱԿ-ի հանձնակատարի գրասենյակը՝ հղում անելով կառավարության տվյալներին։ Նրանցից շուրջ 120,000-ը տեղավորված է կառավարության կողմից կազմակերպված ապաստարաններում, մինչդեռ մյուսները դեռևս չունեն բնակության վայր, ասվում է փաստաթղթում։
«Շատերը մնում են հարազատների կամ ընկերների մոտ կամ դեռևս կացարան են փնտրում։ Մենք տեսնում ենք մեքենաներ, որոնք շարված են փողոցների երկայնքով՝ քնած մարդկանցով»,- ասել է Լիբանանում հանձնակատարի ներկայացուցիչ Կարոլինա Լինդհոլմ Բիլինգը։
Լիբանանն այս ամիս ներգրավվեց պատերազմի մեջ, երբ երկրում տեղակայված Իրանի կողմից աջակցվող «Հըզբոլլահ» խմբավորումը Թեհրանին աջակցելու համար հրթիռներ և անօդաչու թռչող սարքեր արձակեց հարևան Իսրայելի ուղղությամբ, ինչին ի պատասխան՝ Իսրայելը սկսեց ռմբակոծել ամբողջ երկիրը։
Լիբանանի պետական ազգային լրատվական գործակալությունը հայտնել է, որ «իսրայելական թշնամին հարված է հասցրել Աբբասիեին, որը գտնվում է երկրի հարավում՝ Տյուրեի հարևանությամբ»:
Իսրայելցի զինվորականները նաև զգուշացրել են, որ կհարվածեն Տյուրեից շուրջ 40 կմ հյուսիս գտնվող Սիդոն ափամերձ քաղաքին:
Լիբանանի իշխանությունները հայտարարել են, որ մարտի 2-ից ի վեր Իսրայելի կողմից իրականացված հարձակումների հետևանքով զոհվել է առնվազն 486 մարդ, վիրավորվել՝ ավելի քան 1300-ը, իսկ ներքին տեղահանվածների թիվը հարյուր հազարների է հասնում։
Թարգմանությունը՝ Էմմա Չոբանյանի
