10.06.2026 | 23:17
Իրաքի վարչապետը շնորհավորել է Նիկոլ Փաշինյանին ընտրություններում հաղթանակի առթիվ
Խորհրդականները Թրամփին կոչ են անում արագ ավարտել Իրանի հետ պատերազմը. WSJ
Քաղաքականություն
10.03.2026 | 16:35
ԱՄՆ նախագահ Դոնալդ Թրամփի խորհրդականները նրան կոչ են անում մշակել Իրանի հետ պատերազմն ավարտելու ծրագիր՝ վախենալով Սպիտակ տան գործող ղեկավարի համար բացասական քաղաքական հետևանքներից, հաղորդում է The Wall Street Journal-ը, գրում է Meduza-ն։
Իրազեկ աղբյուրների համաձայն՝ խորհրդականները կարծում են, որ կարևոր է ցույց տալ, որ ԱՄՆ-ն արդեն հասել է իր բոլոր նպատակներին Իրանում։ Մինչ Թրամփի պահպանողական թիմակիցները, ընդհանուր առմամբ, կողմ են Իրանի հետ պատերազմին, մտավախություն կա, որ այդ աջակցությունը կարող է նվազել, եթե հակամարտությունը շարունակվի։ Աղբյուրները նշել են, որ Թրամփը տեղեկացվել է հանրային կարծիքի հարցումների մասին, որոնք ցույց են տալիս, որ ամերիկացիների մեծամասնությունը դեմ է պատերազմին։
Բացի այդ, Թրամփի խորհրդականները վախենում են, որ Մերձավոր Արևելքում պատերազմի պատճառով վառելիքի գների բարձրացումը կազդի նրա աջակցության վրա։
Պաշտոնապես ԱՄՆ նախագահի վարչակազմը հայտարարել է, որ վստահ է Թրամփի գործողություններին ամերիկացիների աջակցության հարցում։
«Ամերիկացիների ճնշող մեծամասնությունը կողմ է իրանական ռեժիմի կողմից սպառնալիքի վերացմանը և ահաբեկիչների սպանությանը, և դա այն է, ինչին նախագահ Թրամփը մտադիր է հասնել»,- հայտարարել է Սպիտակ տան մամուլի քարտուղար Քերոլայն Լիվիթը։
Փետրվարի 28-ից ԱՄՆ-ը և Իսրայելը հարվածներ են հասցնում Իրանին: Իրանը հրթիռներով և անօդաչու սարքերով հարվածում է Պարսից ծոցի երկրներին, որոնք ԱՄՆ դաշնակիցներն են: Թեհրանը նաև հայտարարել է, որ արգելափակում է Հորմուզի նեղուցը, որով նավթի և հեղուկ գազի տարանցում է իրականացվում։ Նավթի համաշխարհային գները կտրուկ աճել են Իրանի հետ ԱՄՆ-ի և Իսրայելի միջև պատերազմի ֆոնին։
Թարգմանությունը՝ Էմմա Չոբանյանի
