17.08.2026 | 23:08
Զորականում և Ամասիայում շչակներ են փորձարկվելու
Թրամփը և Պուտինը հեռախոսազրույցի ժամանակ քննարկել են Իրանի և Ուկրաինայի պատերազմների դադարեցման հարցը
Քաղաքականություն
10.03.2026 | 11:55
Կրեմլը հայտնել է, որ նախագահ Թրամփը երկուշաբթի օրը հեռախոսազրույց է ունեցել Ռուսաստանի նախագահ Վլադիմիր Պուտինի հետ և քննարկել Իրանի հետ պատերազմը և Ուկրաինայում պատերազմը դադարեցնելու ջանքերը։
Սա Թրամփի և Պուտինի միջև առաջին զանգն էր Իրանի հետ պատերազմի սկսվելուց ի վեր, գրում է Axios-ը։
Ռուսաստանը Իրանի հիմնական դաշնակիցն է, և ԱՄՆ պաշտոնյաները մտահոգված են, որ այն օգնում է իրանցիներին պատերազմական ջանքերում։ Սպիտակ տան դեսպան Սթիվ Ուիթկոֆը շաբաթ օրը լրագրողներին ասել էր, որ ինքը ռուս պաշտոնյաներին հայտնել է, որ նրանք չպետք է որևէ հետախուզական տեղեկատվություն կիսեն Իրանի հետ։
Պուտինի արտաքին քաղաքականության խորհրդական Յուրի Ուշակովը ռուս լրագրողներին ասել է, որ հեռախոսազրույցը տևել է մոտ մեկ ժամ և եղել է «անկեղծ» և «գործնական»։
Նա նշել է, որ Պուտինը Թրամփին ներկայացրել է Իրանի հետ պատերազմը դադարեցնելու «մի քանի առաջարկներ»։
Իրանի փոխարտգործնախարար Քազեմ Ղարիբաբադին պետական հեռուստատեսությամբ հայտարարել է, որ Ֆրանսիան, Չինաստանը և Ռուսաստանը կապ են հաստատել՝ քննարկելու հրադադարի պայմանները։
Մի քանի ժամ անց Թրամփը լրագրողներին ասել է, որ «շատ լավ հեռախոսազրույց է ունեցել Պուտինի հետ»։
«Նա ուզում է օգտակար լինել [Իրանի հարցում]: Ես նրան ասացի, որ դուք կարող եք ավելի օգտակար լինել՝ ավարտելով պատերազմը Ուկրաինայում», – ասել է Թրամփը՝ հավելելով.
«Մենք խոսել ենք Ուկրաինայի մասին, և դա պարզապես անվերջ պայքար է։ Նախագահ Պուտինի և նախագահ Զելենսկու միջև կա հսկայական ատելություն. նրանք կարծես չեն կարողանում լեզու գտնել։ Բայց ես կարծում եմ, որ այդ հարցի շուրջ զրույցը դրական էր»։
Ուշակովը հավելել է, որ Թրամփը և Պուտինը քննարկել են նավթի շուկաներում գների կտրուկ աճը։ Անցյալ շաբաթ ԱՄՆ-ն ժամանակավորապես թույլատրել է Հնդկաստանին գնել ռուսական նավթ՝ արտադրության պակասը մեղմելու հույսով։
Թարգմանությունը՝ Էմմա Չոբանյանի
