Իրանում պատերազմը կավարտվի «շատ շուտով». Թրամփ

ԱՄՆ նախագահ Դոնալդ Թրամփը հայտարարել է, որ Իրանում պատերազմը կարող է ավարտվել ավելի արագ, քան նախկինում էր նախատեսված, գրում է DW-ի ռուսական ծառայությունը։

«Կարծում եմ՝ պատերազմը գրեթե ավարտվել է։ Նրանք չունեն նավատորմ, չունեն կապի միջոցներ, չունեն ռազմաօդային ուժեր»,- ասել է Սպիտակ տան ղեկավարը CBS News-ի հետ հեռախոսազրույցում։

Նա նաև հավելել է, թե ԱՄՆ-ն ու Իսրայելը «դեռ բավականաչափ չեն հաղթել»։

Ավելի ուշ, Ֆլորիդայում մամուլի ասուլիսի ժամանակ Թրամփը բացասական է պատասխանել Իրանում պատերազմն այսս շաբաթ ավարտվելու մասին լրագրողի հարցին։ Նա միայն ասել է, որ դա տեղի կունենա «շատ շուտով»՝ կոնկրետ ամսաթիվ չնշելով։ Նա հավելել է, որ պատերազմի ամենամեծ վտանգն անցել է երեք օր առաջ։

CBS-ին տված հարցազրույցում Թրամփը շեշտել է, որ Իրանի հրթիռները գրեթե ամբողջությամբ ոչնչացվել են, իսկ անօդաչու թռչող սարքերը և դրանց արտադրության օբյեկտները շարքից դուրս են եկել. «Եթե նայեք իրավիճակին, նրանց ոչինչ չի մնացել։ Ռազմական տեսանկյունից՝ ոչինչ չի մնացել»։

ԱՄՆ նախագահը պնդում է, որ Հորմուզի նեղուցը, որը կարևորագույն նավագնացության ուղի է, որի նկատմամբ Թեհրանը լիակատար վերահսկողություն էր ստանձնել մի քանի օր առաջ, այժմ բաց է, և նավագնացությունը թույլատրվում է։ Այնուամենայնիվ, Թրամփը հավելել է, որ ինքը քննարկում է նեղուցի «վերահսկողությունը ստանձնելու» հնարավորությունը։

Մինչ այդ, Իրանի Իսլամական հեղափոխության պահապանների կորպուսը (ԻՀՊԿ) պահանջել է, որ արաբական և եվրոպական երկրները, որոնք ձգտում են Թեհրանից իրավունք ստանալ ազատորեն անցնել Հորմուզի նեղուցով, վտարեն Իսրայելի և ԱՄՆ դեսպաններին։

Բացի այդ, Դոնալդ Թրամփը հայտարարել է, որ «հիասթափված է» Մոջթաբա Խամենեիին Իրանի նոր գերագույն առաջնորդ նշանակելու կապակցությամբ, որին նա անվանել է «հին խնդիրների լրացուցիչ մաս»։ ԱՄՆ նախագահը նախկինում հայտարարել էր, որ Իրանի նոր առաջնորդը պետք է ստանա Վաշինգտոնի հավանությունը, հակառակ դեպքում «նա երկար չի դիմանա»։

Իրանում պատերազմի սկսվելուց կարճ ժամանակ անց, որը ԱՄՆ-ն և Իսրայելը մղում են փետրվարի 28-ից, Դոնալդ Թրամփը կարծիք էր  հայտնել, որ գործողությունը կտևի չորսից հինգ շաբաթ։

Թարգմանությունը՝ Էմմա Չոբանյանի