Քաղաքականություն
09.03.2026 | 22:40
Թուրքիան անհրաժեշտ նախազգուշացումներ է արել Իրանին, սակայն Թեհրանը շարունակում է «սխալ քայլեր» ձեռնարկել, հայտարարել է Թուրքիայի նախագահ Ռեջեփ Թայիփ Էրդողանը՝ ընդգծելով, որ Անկարայի առաջնահերթությունը երկիրը հակամարտությունից հեռու պահելն է, գրում է Daily Sabah-ը։
Կառավարության նիստից հետո ճեպազրույցում Էրդողանն ասել է, որ Թուրքիան ուշադիր հետևել է Իրանի հակամարտության շուրջ զարգացումներին և անմիջականորեն հայտնել է իր մտահոգությունները։ Նա կրկին նշել է, որ Անկարայի գլխավոր նպատակն է՝ կանխել Թուրքիայի ներքաշումը պատերազմի մեջ՝ շարունակելով պաշտպանել դիվանագիտությունը։
«Ինչպես մյուս պատերազմներում՝ Թուրքիան կանգնած է արդարության կողմում և աջակցում է հակամարտությունների լուծմանը երկխոսության միջոցով»,- ասել է Էրդողանը։
Թուրքիայի նախագահը նաև ընդգծել է երկրի պաշտպանական կարողությունները՝ ասելով, որ երկիրն ունի իր անվտանգությանն ու ինքնիշխանությանն ուղղված սպառնալիքներին արձագանքելու կարողություն։
«Թուրքիան ուժեղ է և կարողունակ բոլոր ոլորտներում։ Այն ունի ցանկացած հարձակում հետ մղելու և իր գոյատևմանն ուղղված կեղտոտ ձեռքերը կոտրելու կարողություն»,- հայտարարռլ է նա։
Այսօր ավելի վաղ Թուրքիայի ազգային պաշտպանության նախարարությունը հաստատել էր, որ Իրանից արձակված և Թուրքիայի օդային տարածք մտած բալիստիկ հրթիռը որսացել են ՆԱՏՕ-ի օդային և հակահրթիռային պաշտպանության միջոցները, իսկ բեկորներն ընկել են Գազիանթեփի դատարկ հողատարածքների վրա։
Թարգմանությունը՝ Էմմա Չոբանյանի
