Ռուբիոն հայտարարել է, որ Իրանն իր հարձակումներով «փորձում է պատանդ պահել աշխարհը»

ԱՄՆ պետքարտուղար Մարկո Ռուբիոն Իրանին մեղադրել է պատասխան հարվածների միջոցով «աշխարհը պատանդ պահելու» մեջ, միաժամանակ, պնդել, որ Միացյալ Նահանգները ճիշտ ուղու վրա է իր պատերազմական նպատակներին հասնելու համար, գրում է Al Arabiya-ն։

«Կարծում եմ՝ բոլորս հիմա տեսնում ենք այն սպառնալիքը, որն այս կղերական ռեժիմը ներկայացնում է տարածաշրջանի և աշխարհի համար։ Նրանք փորձում են աշխարհը պատանդ պահել։ Նրանք հարձակվում են հարևան երկրների, նրանց էներգետիկ ենթակառուցվածքների, նրանց քաղաքացիական բնակչության վրա։ Այս առաքելության նպատակն է ոչնչացնել նրանց կարողությունը, և մենք ճիշտ ճանապարհին ենք դրան հասնելու համար»,- ասել է Ռուբիոն։

Միացյալ Նահանգները և Իսրայելը փետրվարի 28-ին հարձակվեցին Իրանի վրա՝ սպանելով նրա երկարամյա գերագույն առաջնորդ այաթոլլահ Ալի Խամենեիին։ Այդ ժամանակից ի վեր Իրանը հրթիռների և անօդաչու թռչող սարքերի հարվածներ է հասցնում Իսրայելին և Պարսից ծոցի երկրներին։

Ռուբիոն ելույթ է ունեցել ձերբակալված ամերիկացիներին և պատանդներին նվիրված միջոցառման ժամանակ։ Նրան են միացել Ռոբերտ Լևինսոնի՝ ՀԴԲ նախկին գործակալի ընտանիքի անդամները, որն անհետացել է 2007 թվականին իրանական Քիշ կղզում։ Միացյալ Նահանգները 2020 թվականին եզրակացնել է, որ Իրանի կառավարությունը ներգրավված է եղել նրա ենթադրյալ մահվան մեջ։

Լևինսոնը, ըստ լուրերի, հետաքննում էր ծխախոտի կեղծումը, չնայած The Washington Post-ը 2013 թվականին հայտնել էր, որ նա համագործակցում էր ԿՀՎ-ի հետ և մասնակցել էր չարտոնված հետախուզական տվյալների հավաքագրման առաքելության։

Թարգմանությունը՝ Էմմա Չոբանյանի